Shillong, Rymphang 16: U lat ka jylla u CH Vijayashankar u la pyntip ba ka sorkar kan shim da ki sienjam ba tyngeh ban pynbeit noh ka jingkajia pud hapdeng ka Meghalaya bad Assam bad shen yn sa thung mawpud noh haki 2 jaka bala dep ka jingiapynbeit pud.
Haba kren haka Dorbar Mang tyngka kaba la sdang mynta ka sngi u Lat ka jylla u la ong ba ka jingthung mawpud noh haki khappud jong ka Assam bad Meghalaya khamtam haki 6 tylli ki jaka kajia pud ka long kaba donkam khamtam ban pynneh ïaka MoU bala soi hapdeng ki ar jylla.
U la pyntip ruh ba kane ka jingpynbeit pud kala sdang ha kaba 54 tylli ki mawpud la thung ha ka thaiñ Hahim bad 83 tylli haka thaiñ Gizang ryngkat ka jingpynkhreh ïa ka jingpeitngor ïa u pud u sam jong ka Meghalaya bad Bangladesh da kaba pynjur ïaka jingpahara bad ki bor syntiat lyngba ka jingïatreilang bad ki shipai BSF.
