Nongpoh, Risaw 26: Ka thong jong ka Ri Bhoi District Cricket Association ban kyntiew ia ka kam ialehkai Kriket khamtam ban pyntbit ia ki samla donsap ialehkai naduh ka ryta ba dang khynnah, mynta ka 26 tarik Risaw ka la pynlong ia ka Talent Haunt kaba shisngi na bynta ki heprit ha ka madan ialehkai jong ka Umran Niangbyrnai.
Ha kane ka talent haunt ban wad ia ki heprit donsap ialehkai Kriket ha ka ryta kaba 10 haduh 17 snem la ia treilang hapdeng ka RBDCA lem bad ka Seng Samla Shnong ka Umran Niangbyrnai ha kaba la sakhi ia ka jingiashimbynta jong palat 100 ngut ki heprit kynthup kynthei bad shynrang ki la poi ban pyni ia la ka sap ialehkai.
La wan ban khmieh bniah ha kane ka talent haunt ban khmieh bniah ia ka sap ialehkai Kriket da ki nonghikai kiba la ioh jingithuh na ka BCCI ba kynthup ia u Shankar Newar BCCI Level 1 Coach bad u bah Levi Marwein dkhot jong ka RBDCA, u Samla Steve Wahlang, President ka Seng Samla Shnong Umran Niangbyrnai bad kiwei kiwei.
Na ka liang ka RBDCA, ka la pynbna ruh ba kan nang iai bteng ban pynlong ia kum kine ki rynsan ban wad ia ki sap ialehkai Kriket kiba kyrpang jong ki heprit ban sa pynlong ha kylleng ki Shnong jong ka them Ri Bhoi District.
