Nongpoh, Risaw 26: Ka skulbah University of Science & Technology Meghalaya (USTM), Killing kaba don ha Ri Bhoi District da ka jingkmen mynta ka sngi ki la pynlong ia ka jinglehkmen kaba kyrpang, kaba dei hadien ba ka PA Sangma International Medical College & Hospital ka la ioh ia ka jingmynjur na ka National Medical Commission na ka bynta ban plie noh ia katei ka jaka pule na ka bynta ka Bachelor of Medicine, Bachelor of Surgery (MBBS) kaba don 150 tylli ki seat.
Ha kane ka sngi kyrpang katei ka skulbah, la wan ruh ban ia sakhi lang da ka jingiadon lang ka Lok u (L) Purno A. Sangma ka Soradini K Sangma, u myntri rangbah ka jylla bad uba dei u khun jong u Purno A. Sangma u Conrad K. Sangma, ka myntri sorkar ka Dr. Ampareen Lyngdoh, u MLA ka Shylla u Balajied Kupar Synrem, ki samla pule, ki professor bad kynthup u Chancellor ka USTM u M. Hogue nalor kwiei kiwei ki riew pawkhmat.
Haba ai jingkren ha kane ka sngi kum u kongsan, u Conrad K. Sangma myntri rangbah ka jylla u la pynpaw ka jingkmen kaba khraw ba katei ka skulbah ka la ainam ia ka kyreng u Kpa jong u, ia katei ka International Medical College & Hospital bad ha kajuh ka por u la kular ba ka sorkar kan ai ka jingkyrshan na ka bynta ban dang kyniew ia katei ka jaka pule doctor bad ka jaka ai jingsumar khnang ba kan ai shisha ka jingmyntoi na ka bynta ki samla bad ruh ki paidbah jong ka jylla hi baroh kawei.
U Chancellor ka USTM u M. Hogue haba kren ha kane ka sngi, u la pynpaw ia ka jingkmen ban ioh ban rakhe ia kane ka sngi kyrpang bad ha kawei ka bynta u la ai khublei kyrpang ia ka sorkar Meghalaya kaba la ai ka jingkyrshan ia kane ka skulbah bad u kyrmen skhem ruh ba kane ka skulbah kan dang ai jingmyntoi shibun ia ki khun samla ka jylla Meghalaya bad wat ha ki jylla shatei Lam Mihngi ka ri India.
U la ong ruh ba ka USTM ha ka jingiaid lynti kaba la seng tang ha u snem 2008, ka jingkhublei kaba kyrpang ka leit sha u Dr Donkupar Roy (bam kwai ha dwar U Blei), namar dei ka jingdon bynta jong u ban ai jingbit ha ka pork aba u long u myntri rangbah ba kane ka skulbah ka ieng ban kyntiew ia ka pule ka puthi ha kane ka jylla.
Ha kawei ka bynta, u Hogue u la pynbna ruh ba ka USTM kan sa pynkha ruh sa kawei de ka shnat pule kaba ia dei bad ki bniat lane ka Dental College kaba yn ai kyrteng ban pynsahnam ia u Dr. Donkupar Roy (bam kwai ha dwar U Blei).
