U Dr. Celestine Lyngdoh, MLA ka Umsning Constituency mynta ka sngi u la leit ban plie paidbah noh ia ka ïing Dorbar ka Raid Nongsohbar ba hap ha ka HIma mylliem ha ka Shnong Umkaduh ha Ri Bhoi, kba dei kawei na ka jingangnud ka Raid ban ioh ia katei ka ïing Dorbar ka ban long kum ka shlem ban saindur ia ki kam sian hima sima bad ia ka bha ka miat ki khun ki hajar hapoh ka Raid Nongsohbar.
La sakhi ruh ha kane ka sngi ba la plie ia ka ïing Dorbar da ka jingdon lang u Syiem ka Raid Mawthoh u Paiem S. Syiem, u Lyngdoh ka Raid Nongsohbar u Bah Herlin Lyngdoh, ki rangbah shnong bad kynthup ki paidbah nongshong shnong.
Ia kane ka ïing Dorbar la tei lyngba ka jingmang tyngka lyngba ka skhiim SRWP ha ka jinglut kaba la kot sha ka T. 9.5 lak.
Lyngba jong kane ka sngi, u Dr. Celestine Lyngdoh, u la pynpaw ia ka mynsiem jong ka jingkmen ba kane ka jingangnud ka raid ka la urlong bad mynta ka sngi la ioh ban plie paidbah ia katei ka ïing Dorbar ka ban long ka sngi sah jingkynmaw pateng la pateng ba ka Raid ba kane ka ïing Dorbar ka ieng ban sakhi na ka bynta ban saindur ia ki kam kiba dei na ka bynta ka bha ka miat jong ki shnong ba hap hapoh kane ka Raid.
U la kyntu ruh ia ki paidbah nongshong shnong ban pyndonkam hok ia kane ka ïing Dorbar da kaba ri bad sumar bha khnang ba kane ka ïing Dorbar kan long shisha kum ka shlem ba ki longsan mansan ka Raid ryngkat ki khun ki hajar kin ioh ban ia thir ne ia tai na ka bynta ban kyntiew ia ka bha ka miat bad ka roi ka par jong ki paidbah ba hap ha kane ka Raid Nongsohbar.
