Ka Dei Ka Jingpule Engineering Ba Nyngkong Ha Ka Jylla
Shillong, Jymmang 15: Ka khubor kaba sngewtynnad eh bad kaba la long ruh kum ka jingjop kaba khraw na ka bynta ka pule puthi ha ka jylla Meghalaya, ha kaba na ka liang u Myntri Rangbah ka jylla u Conrad K Sangma, u la pynpaw paidbah ba ka Shillong Government College of Engineering ka la ioh ia ka jingmynjur ba pura na ka All India Council for Technical Education (AICTE) na ka bynta ban sdang ia ki jingpule kiba dei na bynta ka Civil Engineering bad Electrical Engineering Course ha ka jylla.
Haba pyntip halor kane ka jingjop kaba khraw ba ka liang ka tnad pule puhti ha ka rynsan social Media, u Myntri Rangbah u la ong “Nga sngewkmen ban pynbna ba ka Shillong Government College of Engineering ka la ioh ia ka shithi jingmynjur na ka AICTE ban sdang ia ki jingpule Civil bad Electrical Engineering,” u la pynpaw ruh ba kane ka dei ka College engineering kaba nyngkong eh ha ka jylla Meghalaya.
La pynpaw ruh, ba kane ka dei ka sienjam kaba kongsan ha ka jingpyniar ia ki jingtei ia ki shlem pule Technical ha ka jylla bad ban pynmih ki lad na ka bynta ki samla pule trai ri ban iai bteng ia ki jingpule engineering khlem da hap ban leit shabar ka jylla.
U Myntri Rangbah ka jylla, u la plie ia ka Government Engineering College kaba nyngkong jong ka jylla, ka Shillong Government Engineering College ha Mawlai Kynton Massar hapoh ka Rashtriya Uchchatar Shiksha Abhiyan (RUSA) ha ka 16 tarik Jylliew, 2023.
Lah ban kdew ruh, ba ka Shillong Government Engineering College kan pyniaid ia ki jingpule Degree ha ki lai tylli ki tnat technical kata ka Civil Engineering, Electrical Engineering bad Mining Engineering bad kan don ka jingpdiang ia ki 30 ngut ki samla pule ha kawei pa kawei ka tnat.
