Nongpoh, Risaw 21: Ka Skulbah University of Science and Technology Meghalaya (USTM) ka la dang paw kat dang mih ki sngi da ka jingdon ki samla pule kiba wan rah ia ka nam bad ka burom ia kane ka skulbah bad kane ka jingshisha ka paw hadien ba haduh 64 ngut ki samla pule katei ka skulbah ki la pass ha ka examination UGC NET, CSIR NET bad JRF bad tang ha kine ki khyndait snem ki don haduh 386 ngut ki samla na katei ka skulbah kiba la pyndep ia kitei ki examination.
Kaei kaba ka ai jingmyntoi ia kine ki samla kiba la paw bad kiba la pyndep ia kitei ki jingpule, kadei ka jingtreikam katei ka skulbah USTM ba la tip kum ka ‘Pay Back Policy”, ha kaba katei ka skulbah ka la pynphai biang ia ka jinglut jingsep ki samla pule ha katei ka skulbah (Fess structures), kaba dei halor ka jingpynshlur ia ki samla pule kiba la wan rah nam rah burom ia katei ka skulbah da kaba ki la pass ia kitei ki examination.
Haba kren halor kane ka jingjop kitei ki samla pule, u Mahbubul Hoque, Chancellor ka USTM u la ong, “ ba ka skulbah USTM ka dang buh ia ka thong ban ai ki jinghikai bapher bapher bad pynthikna ia ki samla pule ba kim dei ban jop tang ha ki competitive examination, hynrei ba kin long ruh ki nongialam ha ki bynta bapher bapher kaba ki don ha ka imlang ka sahlang” bad bynrap ruh ba ka University ka la pynshlur da kaba ai khusnam khnang ba kin dang ioh mynsiem ban ia khun ia ki examination bapher bapher bad khatam ki khynnah kiba stad kiba wan na ki longing baduk ki dei ban bteng ia ka jingpule ba ka University ka iarap ban kyrshan ba kin pyndep ia kita ki jingpule jongki” u la bynrap.
Haba ai khublei kyrpang ia ki samla pule kiba la wan rah ia ka jingjop, u Prof. G.D Sharma, Vice Chancellorka USTM u la ong, “ ka USTM Coaching Programs ka ju plie lad ia ki sala pule ha ki bynta bapher bapher jong ka jingpule jongki ba kane ka long ban pynthikna ba ki samla ki lah ban jop ha ki jingpule bapher bapher jongki lyngba ka jingdon kum kine ki prokram ba la iarap kyrpang da ka University.
Ka Dr. Trishna Thakuria, Director, University NET Forum ka la iathuh ba kum ka jingpynshlur ia kitei ki samla kiba la pas ha kitei ki examination bapher bapher, ka university lyngba ka Payback Policy ka la pynphai biang ia ka bai lut bai sep kitei ki samla pule haduh Rs. 1.3 Klur hadien ba ki la pyndep ia katei ka NET exam, kaba long ka jingpynshlur ia ki sala ba kin pas ia ka NET, GATE, SLET, IAS, bad kiwei kiwei ki examination kum kita ki samla pule katei ka skulbah.
