U nongialam jong ka liang pyrshah ka Lok Sabha, u Rahul Gandhi mynta ka sngi, u la thoh da ka shithi sha u myntri rangbah duh ka ri, u Narendra Modi ban kyrpad na ka bynta ban ailad ban iatai bad iamir jingmut ia ka mat jong ka NEET hapoh ka Ïing Dorbar Thawain ka ri.
Katei ka jingthoh shithi jong u Rahul Gandhi sha u Narendra Modi, kadei hadien ba baroh ar tylli Ïng Dorbar Thawain ka ri kiba kynthup ia ka Lok Sabha bad Rajya Sabha ki la kyntait mardor ia katei ka jingiatai bad iamir jingmut halor ka NEET kaba la wanrah da ka liang pyrshah ha ka 28 tarik jong u bnai Jylliew, 2024.
U Rahul Gandhi lyngba katei ka shithi, u la iathuh ruh ba na ka liang jong u shongknor ka Lok Sabha, ula kular ban ailad ban iatai ia katei ka mat bad pyntip ruh ba ka jingthmu jong ka liang pyrshah ka long ban iatai bad ia mir jingmut kumno ban thawlad thaw lynti na ka bynta ka bha ka miat jong ki samla pule ka ri.
U la iathuh ruh ba kumba long mynta, ki don jin haduh 24 lah ngut ki samla pule na kylleng ka ri kiba la pynkhreh ban iakhun ia katei ka eksamin NEET, bad ka jinglait tuh jong ki jingkylli bad ka jingpynsangeh ia kane ka eksamin, kalong kum ka jingshet kylla kaba khraw ia ki samla pule ka ri.
“Mynta kine ki samla pule lem bad ki bahaing hasem jongki, ki peit sha ngi, ki nongmihkhmat ki jongki ban ngin shim ia ki sienjam kiba shlur bad kiba shai ban weng ia ka jingeh ka jongki. Ka eksamin NEET ka donhok ban ioh ia ka jingshahskhor bad ka jingpynleit jingmut naba ka la thad madan ia ka jingduna kaba shyrkhei ha ka pule puthi jong ki kyrdan kiba kham shalor” la thoh u Rahul Gandhi ha katei ka shithi bad iathuh ba ha kine ki hynniew snem kiba la leit noh, ka la don haduh 70 sien ka jinglait tuh jong ki jingkylli kaba la ktah ia ka palat 2 klur ki samla pule jong ka ri.
U Rahul Gandhi u la kynnoh ruh ba ka jingthmu pynsangeh jong ka sorkar sa ia kiwei kiwei ki eksamin bad ban bujli ia u Director General jong ka National Testing Agency kadei tangka jingpyrshang ban tap eit miaw ia ki jingduna kiba don kiba bun kiba don naduh na tynrai jong ka National Testing Agency.
“Ki samla pule ki donhok ban ioh ia ka jubab. Ka jingiatai bad iamir jingmut ha ka Ïing Dorbar Thawain jong ka ri, kadei ka sienjam kaba nyngkong na ka bynta ban tei bad wanrah ia ka jingshanniah ka jongki. Namar ka jinglong kyrkieh jong ka kam, nga kyrpad ia ka sorkar ba kan ailad ia kane ka jingiatai lashai ka sngi. Nga ngeit skhem ba ka long kaba biang eh lada phi lamkhmat ia kane ka jingiatai bad iamir jingmut na ka bynta ka bha ka miat bad ka jingmyntoi jong ki samla pule” la thoh u Rahul Gandhi ha ka shithi sha u Narendra Modi, myntri rangbah ka ri.
