U heh duh ki shipai ryngkew jong ka ri India uba dang shu shimti shen ia ka kam, u General Upendra Dwivedi mynta ka sngi u pynkup burom ia saw ngut ki heh shipai jong ka ri kiba kynthu ia u Lt. Colonel Sanjeev Malik, u Major Anish George, u Captain Stephen Sebastian bad ka Captain Dania James halor ka jinglah ka jongki ban ioh khusnam ha ka lympung World Medical Health & Games (WMGH) kaba 43 kaba la pynlong ha St. Tropez jong ka ri France.
Kitei ki saw ngut ki heh shipai ka ri, ki la ioh ban khur haduh 19 tylli ki takma ksiar, 9 tylli ki takma rupa bad 4 tylli ki takma rnong ha katei ka lympung kaba la dep ban pynlong naduh ka 16 tarik haduh ka 23 tarik jong u bnai Jylliew, 2024.
Ha kane ka sngi, na ka liang u General Upendra Dwivedi u la ai ka jingiaroh sha kitei ki heh shipai kiba la trei shitom bad wanrah ia ka nam ka burom ia ki shipai jong ka ri India lyngba kitei ki jingjop badonburom ka jongki ha ka rynsan jong ka pyrthei bad ai ruh ia ka jingkyrkhu kyrdoh bad kitbok kitrwiang kaba bha tam ha ka jingim ka jongki la shai la shisngi.
