Ka tnad pule puthi ka jylla Meghalaya mynta ka sngi ka la pyntip paidbah ba u Babu Everlasting Pyngrope, Principal ka Mynken Christian Higher Secondary School, Bhoirymbong na Ri Bhoi District, u la shah jied ia ka khusnam ba kyrpang ba la tip kum ka ‘National Teachers’ Award 2024’.
Ia kane ka khusnam kyrpang na ka liang u Babu Everlasting Pyngrope un sa ioh pdiang ha ka 5 tarik u Nailur 2024 ha Vigyan Bhawan, New Delhi.
Kumba la pynpaw, u Babu Everlasting Pyngrope u la ioh pdiang ia kane ka khusnam, ka dei halor ki ka kiba u la shakri ban kyntiew ia ka pule ka puthi bad u la long ruh uwei na u nonghikai skul uba la noh syniang shibun ban kyntiew ia ka pule ka puthi bad ka jingnang ka jingstad kum u nonghikai uba la shakri la bun phew snem mynta na katei ka skul kaba don ha Ri Bhoi.
