Nongpoh, Jylliew 11: Ka ophis ka District Social Welfare Officer, Ri Bhoi District, ha ka jingïatrei ryngkat bad ka ophis u Deputy Commissioner ka Ri Bhoi bad ka District Hub for Empowerment of Women, Ri Bhoi, mynta ka sngi ki la pynlait paidbah ïa ka Nasha Mukt Bharat Abhiyan, kaba dei kawei na ka thong ba ïakhun pyrshah ne pynduhjaid ïa u drok ha ka ri la wan rah kyrpang da ka sorkar kmie.
Ïa kane ka Nasha Mukt Bharat Abhiyan la pynlait paidbah da u Deputy Commissioner ka Ri Bhoi, u Abhilash Baranwal ha ka jingïalang kaba la long ha Parish Hall, Nongpoh.
La sakhi lang ruh ha kane ka sngi da ka jingdon lang ka Dr. A. Kharduid, DMHO ka Ri Bhoi, ka Kong N.F Sun, District Social Welfare Officer ka Ri Bhoi, ka Kong K.B Jyrwa, DSEO ka RI Bhoi,u Bah B. Suchiang ba mih khmat na ka tnad Pulit bad ki khynnah skul, ki nonghikai bad kiwei de.
Kum ban la pynpaw, ka thong jong kane ka Nasha Mukt Bharat Abhiyan, ka dei ka skhim kyrpang ba la wan rah da ka sorkar kmie lyngba ka Ministry of Social Justice & Empowerment bad ka thong ka long ban pynduhjaid bad ban ïa khun pyrshah na ka jingktah u drok ha ki jylla bad ka ri.
Ha kane ka sngi ki khynnah skul bad ki khynnah skul ki la shim bynta ruh ha ka signature campaign ban kyrshan na ka bynta ban ïakhun pyrshah ïa u Drok ha Ri Bhoi.
Ki nongkren ha kane ka sngi, naduh u Deputy Commissioner ka Ri Bhoi, u Abhilash Baranwal, ka DMHO ka Dr. Angel Kharduid bad kiwei, ka phang ba ki la ban khia ka long ban ïa tylli lang ban ïa khun pyrshah ïa u Drok lyngba kane ka Nasha Mukt Bharat Abhiyan, namar haba don ka jingïatrei lang lah ban pynduh jaid ïa u Drok kumba ka sorkar ka la buh ïa ka thong ban ïa khun pyrshah ïa u drok lyngba katei ka skhim kyrpang ba la wan rah ha ka ri.
