Ka Myntri ka tnat ka koit ka khiah ka Kong Ampareen Lyngdoh kala pyntip baka World Health Organization (WHO) ka dang pynlong ka jingtohkit halor ka jingsuba khie biang ka jingpang Polio ha Garo Hills.
Ka Kong Ampareen kala iathuh ba la suba ba kane ka jingpang kadei Wild Polio bad ka long pher naka jingpang Polio kaba la duh jait ha baroh kawei ka Ri India.
“Ka Sorkar Jylla lyngba ka tnat ka koit ka khiah kala shimkhia bad kala buddien ia i khynnah ba suba ioh jingpang Wild Polio” la ong ka Kong Ampareen.
Ka Kong Ampareen kala iathuh ba iaka ba mynta i khynnah i don haka met ka ba koit ba khiah bad naka liang ka Sorkar Jylla ka dang ap iaki jingbthah naka WHO haba iadei bad ki sienjam ban shim halor kane.
Kala iathuh baka Sorkar Jylla kan ap iaki bthah naka WHO, la ka donkam ne em ban shna biang bad ban ai tika naka bynta ka Wild Polio.
Nalor kane ka Myntri ka tnat ka koit ka khiah kala kam ruh ba ka don ka jingbym kwah ki kmie ki kpa ban ai injek iala ki khun.
“La donkam ban pynlong daki program ialap paidbah halor ki jingpang khunlung kiba don jingma hadien ha bud khnang baki paidbah khamtam ki kmie ki kpa kin long ba kloi ban ai injek iala ki khun” kala ong.
