Na ka jingleit pyniasoh ki 3 ngut ki MLA ka Congress ha ka party NPP kaba la pynphaloh ia kiba bun ki jingmut jingpyrkhat ki paidbah ha ka jylla, u President ka Umsning Block Congress Committee, u Bah Rocky Marwein u la ong ba ka party Congress ha Umsning kam don jingtip satia ia ka jingleit pyniasoh NPP u MLA u Dr. Celenstine Lyngdoh ba ju khot ieit Dr. Bom bad kane ka rai kaba u la leit ban pyniasoh sha ka party NPP ka dei hi tang ka rai jong u shimet.
Ia kane la pynsngew sha ki lad pathai khubor da u Bah Rocky Marwei, uba dei u president ka Umsning Block Congress Committee, hadien ka jingialang ba kyrkieh jong ka Central Executive Committee kaba la long mynta ka sngi ha Umsning.
Ha kane ka central executive committee la wan shim bynta lang ruh da baroh ki nongialam na ki Area bapher bapher jong ka Umsning Constituency.
Haba kren sha ki lad pathai khubor, u Bah Rocky Marwein u la ong ba ka party Congress ha Umsning haduh mynta ka dang khlain bad ka dang treikam bad kynnoh ruh ba ka jingleit pyniasoh u Dr. Celestine Lyngdoh sha ka party NPP ka dei tang ka rai jong u shimet, ha kaba ka party Congress kan treikam hi kumba ka ju long baroh shi katta ban pynkhlain ia la ka party.
Shuh shuh, ha kajuh ka por u la kypad ruh sha baroh ki nongialam, ki nongtrei bad ki nongkyrshan ka party Congress ha Umsning kim dei ban duh mynsiem bad ka party Congress ka dang khlain bad kum ka party kan dang bteng ban ai ka jingshakri na ka bynta ki paidbah ka Umsning Constituency hi baroh kawei, u la bynrap.
