Ka Myntri ka Koit ka Khiah Kong Ampareen Lyngdoh hynne ka sngi kala pyntip ba ka Sorkar kala dep ban pynkiew ia ka tulop jong ki nongtrei ka 108 Emergency hapoh ka Jylla.
Haba kren sha ki lad pathai khubor, ka Kong Ampareen kala iathuh ruh baka tnat ka koit ka khiah kala pynkhreh ban khot Tender thymmai na ka bynta ban pyniaid ia ka 108 Emergency Services ha Meghalaya.
Ia kane ka Kong Ampareen kala iathuh hadien ka jingiakynduh bad ki Nongtrei 108 kiba la wan kynduh ban ai khublei iaka Sorkar namar ka jingpynkiew tulop.
“Nalor ka jingpynkiew tulop, ka tnat ka koit ka khiah kala shimkhia ruh ia kiwei ki mat kiba iadei bad ka jingtreikam ki nongtrei, ka policy shim shuti bad ki jingmyntoi ban ai sha ki nongtrei ha ka liang ka koit ka khiah” la ong ka Kong Ampareen.
Haba iadei bad ka Tender thymmai ban pyniaid ia ka 108 Emergency Services ha Meghalaya, ka Myntri ka tnat ka koit ka khiah kala ong “Ka tnat kala don ha ka bynta kaba khatduh ban khot ia ka tender thymmai na ka bynta ban pyniaid ia ka 108 Emergency Services”.
Ka Kong Ampareen ka pynpaw ia ka jingsngew skhem ba kiei kiba la mad ha ki snem bala leit noh, kila ai jinghikai kumno ban pynthikna ia ka jinglah pyniaid ryntih ia ki kam ha kane ka kynti ba mynta.
