Ka tnad ka koit ka khiah ka jylla ka la pynmih ia ka jingpynbna ba kino kino ki nongtreikam sorkar bad kito kiba la shongthait kin nym lah ban ioh pdiang ia ka lad jingiarap lyngba ka skhim Meghalaya Health Insurance Scheme (MHIS) bad ia ka Pradhan Mantri Jan Arogya Yojana (PM-JAY) katkum ka Meghalaya Medical Attendance Rules 2021 under rule 3 (7) bad 21 bala pynmih haka 16 tarik Naitung 2024.
Lah ban kdew, ba ka skhim MHIS ka dei ka skhim ba la pynmih da ka sorkar jylla Meghalaya ban ai jingiarap haduh 5 lak tyngka marwei ia ki nongshong shnong ka jylla Meghalaya haba ki leit ban shah sumar pang ha ki hospital kiba la don ka jingiateh bad ka sorkar jylla ban pyntreikam ia kane ka skhim.
Katba ka Pradhan Mantri Jan Arogya Yojana (PM-JAY) lane ba ju tip ruh kum ka Ayushman Bharat ka dei ka skhim ba la pyntreikam da ka sorkar pdeng lyngba ka National Health Policy ha u snem 2017, kaban ai jingiarap kumba 5 lakh tyngka marwei ia ki nongshong shnong ka ri India ha ka shisnem haba ki shah sumar pang ha kino kino ki hospital ha ka ri India.
Kane ka jingpynmih ia kane ka jingpynbna da ka tnad ka Koit ka Khiah ka jylla Meghalaya, ka la nang pynkhih mynsiem bad pynkhuslai ia kiba bun ki nongtreikam sorkar ne kito kiba la shongthait, namar mynta kin duh noh ia kane ka lad jingiarap kaba ki ju ioh barabor haba ki leit ban shah sumar ha ki jaka sumar ha ka jylla.
