Nongpoh, Risaw 16: Kiba bun ki nongshong jong kawei ka Bus Nigth Super mynta ka step ki la her mynsiem, kaba dei hadien ba katei ka Bus Night Super kaba don ia u number ML-05-L-8998 ka la kylla kynsan ha Umling, ba la kynnoh tang na ka daw ka jingpynher sted palat u Dribar.
Kane ka jingjia ka la jia ha ka por 7.30 baje mynstep mynta ka sngi, ha kaba na ka daw ka jingpynher sted u dribar katei ka Bus Night Super ka la kylla ha khongdong Umling bad la don bun ki nongshong ha katei ka bus ki la mynsaw bad la rah noh mar mar sha Civil Hospital bad Bethany Hospital ha Nongpoh.
Katkum ka khubor ba la ioh lum katei ka Bus Night Super ka wan na Silchar lyngba ka Lad Rymbai ban hiar sha Guwhahati, hynrei tang na ka daw ka jingpynher sted u dribar katei ka Bus Night Super ka la kylla noh ha Umling bad na ka liang u Dribar ba ym pat tip kyrteng u la phet krad ia lade na katei ka jaka.
Kumba la iathuh da ki nongshong katei ka Bus Night Super, la ong ba ka daw hi kaba la pynlong ia kane ka Bus ba kan kylla ka dei ka jingniah khlem akor u dirbar bad la suba ruh ba u la dih kyiad. Na ka daw ka jingkylla kane ka Bus ha kaba wat la bun ki nongshong kim da mynsaw jur, hynrei ka jingkylla kane ka bus ka la wan rah ka jingdheng kali, namar ba ka la leit ban kylla na shiliang ka surok sha shiliang ka surok.
Halaor kane ka jingjia, ki Pulit ka Ri Bhoi ki dang pynlong ia ka jingtohkit kaba bniah ban lap ia ka daw tynrai jong kane ka jingjia bad ban pynlait na ka jingdheng ki Kali ha kane ka surok bah ki Pulit ka Ri Bhoi ki la tan noh ia katei ka Bus khnang ban iaid beit ka leit ka wan ki paidbah lyngba kane ka surokbah ha Ri Bhoi.
