Ka jingiakilanmet hapdeng ki shipai jong ka ri India bad Mongolia kaba la tip kum ka Nomadic Elephant kaba 16, ka la sdang noh mynta ka sngi, ka 3 tarik u bnai Naitung, 2024 ha ka jaka ai jinghikai jong ki shipai India kaba don ha Umroi, Ri Bhoi District. Kane ka jingiakilanmet jong ki shipai, kaban neh kumba 14 lynter, yn pynkut pat ha ka 16 tarik jong u bnai Naitung, 2024.
Ia kane ka sngi sdang mynta ka step, la wan ban plie da u Nongkit ‘tien syiem ka ri Mongolia, u Ganbold Dambajav ha ka jingiadon ryngkat jong u Major General Prasanna Joshi, General Officer Commanding 51 Sub Area jong ki shipai India.
Ka kynhun shipai ba 45 ngut na ka Sikkim Scouts lem bad kiwei kiwei de ki shipai ki la wan ban iashim bynta ha kane ka jingiakilanmet, katba na ka liang jong ka ri Mongolia, la mihkhmat da ki shipai naka 150 Quick Reaction Force Battalion.
Ka jingthmu jong kane ka jingiakilanmet hapdeng kine ki ar tylli ki kynhun shipai jong ka ri India bad Mongolia, ka dei halor kumno ban pynkhlain ia ka rukom treikam ka jongki, ban ia sam mar kylliang ia ki buit treikam kiba ki don, da kaba phaikhmat kyrpang ha ki rukom iakhun pyrshah ia ki nongshun ha ki jaka kiba long khap sor bad kiba long lum, katkum ka Chapter VII jong ka United Nations.
Na ka liang jong u Nongkit ‘tien syiem ka ri Mongolia, u Ganbold Dambajav, haba kren ha kane ka sngi sdang jong kane ka jingiakilan met, u la ong ba ka jingpynlong ia kum kine ki jait jingiakilanmet ym tang ba ka wanrah ia ka jingiajan hapdeng ki bor shipai, hynrei kan iarap ruh ban pyniar ia ka jingiadei wat ha ka kam sain hima sima, ka koit ka khiah, ka pule puthi bad kiwei kiwei de.
U Ganbold Dambajav u la iathuh ba ia kane ka jingiakilanmet Nomadic Elephant ba shisien shi snem hapdeng ki shipai ka ri India bad Mongolia, la sdang nyngkong eh ha u snem 2006 bad kyrmen skhem ba lyngba kane ka jingiakilanmet kaba 14 sngi lynter, ki shipai jong ka ri Mongolia bad India ruh kumjuh, kin ioh jingmyntoi shibun khamtam ba kin ioh ia sam markylliang ia ki buit treikam ki jongki bad ban wanrah ruh ia ka jingiadei kaba iajan hapdeng kine ki ar tylli ki kynhun shipai.
