Shillong, Lber 07: Ka kynhun pulit jong ka Anti-Narcotics Task Force (ANTF) haka sngi thohdieng kila ioh ban kurup drok ba shongdor haduh kumba 51.13 klur haka jingpynap shrip ha East Jaintia Hills District bad kane ka dei ruh ka jingkurup drok ba heh tam da ki pulit ka jylla Meghalaya.
Katkum ka jingtip bala ioh lum la ong ba ki pulit kila ioh ban pynsangeh ïa kawei ka Tata Sumo kaba don ïa u Number MZ 01 M 8625 kaba shong ar ngut ki briew ryngkat u nongñiah bad haka jingtalasi jong ki pulit katkum ki kyndon aiñ la ong ba na kawei ka longkmie ki pulit kila ioh ban kurup haduh 19 synduk sabon kiba don kumba 203.7-gram u suba heroine, katba haa kawei ka synduk jaiñ jong uwei pat u ba shong lang ha katei ka suma la ioh ban kurup haduh 10.145 kilo u suba Methamphetamine bala suba ruh ba kitei ki 2 ngut ki dei ki nongkhaii drok ba shyrkhei na kawei ka jylla sha kwei pat.
Naka liang ki pulit kila pyntip ruh ba utei u drok bala ioh kurup u shongdor kumba ₹51,13,24,000/- haka dor iew beaiñ bad naka liang ki pulit kila register case ïa kitei ki 2 ngut bad ka jingtohkit ka dang ïaid shakhmat ban lapdien shuh shuh ïa kiwei kiba donkti lang ha katei ka kam.
