‘Aiti ïa kaba bha tam sha u Blei, ngin ïoh pdiang pat ïa ka jingkyrkhu kaba khraw na u’
Nongpoh, Lber 09: Ki paidbah riewngeit na kylleng ki dong bad ki thaiñ jong ka Ri-Bhoi mynta ka sngi ki la tuid paidbah sha ka Balang Presbyterian Diwon ban shim bynta ha ka jingïaseng ba khatduh jong ka Synod Rangbah kaba 28 ka Ri-Bhoi Presbyterian Synod, kaba la sdang naduh ka 5 tarik u bnai Lber bad kaba la poi noh sha kaba kut mynta ka sngi u Blei.
Ha ka jingïaseng kaba nyngkong kaba la sdang ha ka por 10:30 mynstep, la sam ïa ka ktien jong u Blei da u Rev. R.M. Muktieh, uba la kren halor ka phang ba kum ki khun Khristan, kaei kaba bha tam kaba ngi lah ban aiti sha u Blei. U la ban jur halor lai tylli ki bynta kiba kongsan, kata ka jingieid kaba ngi dei ban ai sha u Blei da ka dohnud kaba khuid, ka jingshakri bad ka jingmane hok ïa u, bad ruh ban aiti ïa ki sap bad ki jingïoh pdiang kiba u Blei u la ai sha ngi ban trei ha ka kam jong u, khnang ban pynsaphriang ïa ka ktien jong u sha u bynriew baroh. U la pynpaw ruh ba lada ngi aiti ïa kaba bha tam sha u Blei, ngin ïoh pdiang pat ïa ka jingkyrkhu kaba khraw na u.
Ha kane ka jingïaseng, nalor ki pastor, ki tymmen basan bad ki paid riewngeit na kylleng ki Presbytery ha Ri-Bhoi, la wan ruh ban sakhi da ki riew saiñ pyrthei kiba kynthup ïa u Conrad K. Sangma, Myntri Rangbah ka jylla uba la hiar ruh sha katei ka jingïaseng da ka helicopter, u Bah Sosthenes Sohtun Myntri sorkar jylla ba dei ruh u MLA ka Jirang, u Mayral Born Syiem MLA ka Nongpoh, u Dr. Celestine Lyngdoh MLA ka Umsning, u Charles Marngar MLA ka Mawhati, Bah Damanbait Lamare MLA ka Umroi ka Rona Khymdeit MDC ka Nongpoh, Bah Isynei Hinge MDC ka Umroi, u Mathew K. Makdoh Nominated MDC lem bad kiwei kiwei.
Hadien kata, ha ka jingïaseng kaba ar kaba la sdang ha ka por 1:30 nohphai sngi, la sam ïa ka ktien jong u Blei da u Rev. S.R. Dkhar, uba la kren halor ka jingdonkam kyrkieh jong ki nongïalam ba shisha ha kane ka juk kaba mynta. U la shim nuksa na ka kitab Deuteronomy 1:7, da kaba pynkynmaw ïa ka bynta jong u Moses kum u nongïalam ba la khot kyrpang da u Blei ban lam ïa ki khun Israel na ka jinglong mraw sha ka ri ka jingïarap kaba dap da ka dud bad ka ngap.
Ha kane ka sngi la pynphuh pynphieng ruh ïa ka jingïaseng da ki jingrwai na ki Choir bapher bapher bala shim bynta da ka Diwon Junior CE Society, RBCF Shillong, RBP Synod Music Institute, Ri-Bhoi Sepngi Presbytery CE Union, Diwon CE Society, Ri-Bhoi Shatei Presbytery CE Union, Ri-Bhoi Mihngi Presbytery CE Union, Mawbuh Sarikrai Presbytery CE Union bad ka Standing Choir jong ka Synod CE Union.
