Shillong, Jylliew 14: Ka Meghalaya Bharatiya Janata Party (BJP) kaba don lang haka sorkar synroplang Meghalaya Democratic Alliance (MDA) ka ai jingiroh ïa u Myntri Rangbah ka Jylla daka ba ong, “Haka jingïalam u Conrad K Sangma ka Jylla kala kiew bha haka jingwanrah ïaki kam pynroi”.
Ïa kane ka jingïaroh ïaka Sorkar la kren hi da u President ka Meghalaya BJP u Rikman G Momin baka Party kan nym weng satia ïaka jingkyrshan naka National People’s Party (NPP) kaba ïalam ïaka Sorkar Jylla.
“Ka Sorkar MDA ka treikam bha khamtam u Myntri Rangbah ka Jylla u trei shitom bha bad ka BJP ruh ka ai jingkyrshan ba radbah khnang ban wanrah ïaki kam pynroi naka bynta ki paidbah bad ka Jylla” la ong u Rikman.
Lah ban kdew ba ka BJP ka don 2 ngut ki MLA ka don lang hapoh ka MDA ha kaba uwei ioh bat shuki Myntri Sorkar.
Haba kylli halor ka jingïasam shuki Myntri hapdeng ki MLA, u Presidnet ka BJP u la ong “Kadei kam kamram ban kylliang Myntri Sorkar. Ngam don eiei ban ong”.
“Lada ka por kala wan hangta ngan sa batai. Mynta ngam don eiei ban ong” u la ong.
