Nongpoh, Jylliew 14: Uwei u Nongïalam Shnong na ka Shnong Umshangling ha Ri Bhoi District, mynta ka sngi u la buh syndon da u dak jingkylli ba heh ïa ka sorkar, da kaba ong, “Kan myntoi aiu ban ïa rakhe ïa kata ka World Environment Day’ ba kas orkar ka ju kyntu ïa ki paidbah ban ïada ïa ka mariang, katba ïa ki jaboh jabain pat la shu bret pathar khlem da don kino kino ki lad jingïada kiba lah ban ktah ïa ka mariang”.
Ïa kane la pynpaw da u Bah Vincent Sohkwai, Secretary Shnong ka Shnong Umshangling, haba kren halor ka jaka bret jaboh ba ka Dorbar Shnong ka la khang dam syndon mynta la 3 sngi, namar ka jingbret pathar ïa ki jaboh ba la ktah ïa ki nongshong shnong bad ruh ba la mih ka jingsma iwtung kaba la ktah jur ïa ki nongshong shnong.
U la ong ruh dang shen ngi la ïa rakhe ïa kata ka sngi pynneh mariang ban kyntu ïa ki paidbah ban ïa thung dieng na ka bynta ban ïada ïa ka mariang, hynrei haba phai pat sha katei ka jaka theh niut ka sor Nongpoh la ishyrkhei ka rukom bret pathar ïa ki jaboh kaba la ktah ym tang ïa ka koit ka khiah ki paidbah bad ka la ktah ruh wat ïa ka mei mariang.
Shuh shuh, u la kynnoh ruh ba ka sorkar ka la lehbein ïa ki paidbah nongshong shnong ka Shnong Umshangling da ka jingdon katei ka jaka bret jaboh na ki shnong ba hap ha ka sor Nongpoh, namar kane ka la ktah jur ïa ka koit ka khiah ki paidbah bad ruh wat ïa ka mei mariang bad buh ruh ka jingkylli lada ka sorkar ka thung deing ne rakhe ïa ka sngi pynneh mariang ha kum katei ka jaka ka shongnia shisha ka jingrakhe sngi pynneh mariang katba katei ka jaka pat ka kylla kum kawei na ka jaka ba jaboh tam kaba ktah ïa ka koit ka khiah bad ruh ïa ka mei mariang, u la bynrap.
