Shillong, Jylliew 12: Mynta ka sngi ki pulit ka Meghalaya ki la ioh ban sdang ia ka jingtohkit ba kylluid pyrshah ia ka Sonam Raghuvanshi, u Raj Kushwaha ba la kynnoh ba dei u baiied jongka lem bad ia ki 3 ngut kiba la shah kem da ka jingtreishitom jong ki pulit ka Meghalaya halor ka jingshah pyniap klep u kurim ka Sonam u Raja Raghuvanshi kiba la wan honeymoon sha ka jylla Meghalaya mar ia dep iathoh shongkurim.
Ki pulit ka jylla Meghalaya, hadien ba ka Iingkashari jong ka District and Session Court ka East Khasi Hills District ka la ai jingbit ban tohkit ia ki 5 ngut kiba la kynnoh donkti ban pyniap ia u Raja Raghuvanshi kynthup ia ka Sonam Raghuvanshi, mynta ka sngi ki la sdang ia ka jingtohkit kaba bniah hashwa ban ialam pat ia ki sha ki jaka ba kine ki shikurim ki la pynlut por.
Haba kren bad ki Nongthoh Khubor, u Bah Vivek Syiem, Superintendent of Police ka East Khasi Hills District, u la iathuh ba ha ka jingtohkit, ka Sonam Raghuvanshi, u samla jong ka u Raj Khushwaha bad 3 ngut ki la pyrshang ban pyniap ia u Raja haduh lai sien kata naduh na Guwahati tangba kim iohlad, ki la pyrshang ban khynniat sha ka riat Nongriat hangne ruh ki khlem iohlad, nangta hapdeng ka Mawlakhiat bad Wei Sawdong ki la pyrshang ban pyniap katba u Raja u dang leit shabar hynrei kim iohlad satia bad dei tad ha Wei Sawdong ki la pyndep ia kane ka kam ban pyniap ia u Raja.
Katkum ka jingtohkit kaba dang shu sdang, la pyntip ba ia kane ka jingpyniap ia u Raja, ka dei namar ba ka Sonam ka la don ka jingiadei lypa bad u Raj Khushwaha ba ki la kwah ban ia sah ryngkat lang bad la pyniathoh jubor pynban ia ka bad u Raja.
Lyngba ka jingtohkit la lap ruh, ba 3 ngut kiba donkti ha kane ka jingpyniap ia u Raja, ia kaba la kynnoh donkti da u Raj, u wei u dei u Bakha jong u bad ba kiwei ki dei shiparalok bad kim dei kumba la paw ba ki dei ki ‘Contract Killers’ lane kiba la shimwai bad kine ki la ioh 50 hajar tyngka kum ka jinglut jingsep jong ki ha ka jylla Meghalaya khamtam ha Sohra.
U Bah Vivek, u la iathuh, ba baroh 5 ngut kiba la shah kem halor kane ka kam pyniap briew ki la phla ba ki donkti ban ia suhbuit bad pyniap ia u Raja naduh ki por ba ki bahaiing lem bad u Raja ki dang thmu ban iathoh shongkurim bad ki la suhbuit ban pyniakhlad ia u Raja bad ka Sonam naduh u bnai Rymphang 2025 bad ruh ban pynjah ia ka Sonam na katei ka jingiathoh shongkurim ba la pynbeit da ki bahaiing.
Ha kane ka jingtohkit, u Bah Vivek Syiem u ng ruh, ba ha ka jingtohkit la ioh ruh ia ka jingphla, ba ha ka jingpyrshang ban pyniakhlad ia u Raja Raghuvanshi bad ka Sonam Raghuvanshi, ba kine ki shiparalok baroh 4 ngut ki la pyrshang ban pynthame ban thaw buit kumno ban pynjahklep ia ka Sonam bad kam ruh ba ki la thang ia ka briew bad ka scooty, ka la don ka khep ba ka Sonam ka jahrngai na la iing bad ka la shah rah ha ka Umsaw, hynrei kine baroh kim shem la seisoh satia.
Kine ki briew kiba la donkti ban kyrshan ia u Raj bad ka Sonam ban suhbuit ban pyniap ia u Raja, ki la wanpoi ha Shillong ha ka 19 tarik hashwa ban wan poi ka Sonam bad u Raja na bynta ka honeymoon jong ki ha Meghalaya, hynrei namar ka jingbym iaid beit kumba la thmu ban pyniap ia u Raja na ki jaka ba la pynbeit lypa, ka Sonam ka la pynbor ia u Raja ban leit sha Sohra bad sha Nongriat bad ki la ioh ban pyndep ia ka jingthmu jong ki ha Wei Sawdong.
U Bah Vivek u la ïathuh, ba hadien ba la pyniap ia u Raja, na Lad Mawphlang, ka Sonam kala wanphai sha Shillong Khyndai Lad da ka Taksi bad na Khyndai Lad ka leit phai sha Guwahati daka Taksi, bad ka la leit sha Lokhra ISBT ban shong da ka bus sha Siliguri bad na Siliguri sha Patna (Bihar) nangta na Patna ka la shong biang da ka bus sha Ara bad na Ara ka la leit sha Lucknow ban leit rieh sha Indore.
La iathuh ruh, ba dei ha ka 8 tarik Jylliew, ha kaba ka Sonam ka la pyrshang pat ban phetrieh na Indore, ka kynhun jong ki kiba donkti ban pyniap ia u Raja ki la ioh jingtip ba ki pulit na Meghalaya (Operation Team) kila don lypa ha Uttar Pradesh bad Madhya Pradesh bad kila ioh ban kem uwei na Uttar Pradesh bad hadien ba la iohkem ia u wei na Uttar Pradesh u Raj u la bthah ia ka Sonam ban pyntip sha ki bahaiing ba ka la shah rahbor bad lait phet na ki Nongrah bor ia ka.
Shuh shuh ruh, u Bah Vivek Syiem u la pyntip ba ka jingtohkit ban shim jingkylli na ki baroh san ngut ka dang bteng bad shen yn sa ialam ia ki sha Sohra ban tohkit pat ia kaei kaba la kine baroh ki la donkti ban pyndep ia ka jingthmu jong ki (Plan) ban pyniap ia u Raja Raghuvanshi.
