Nongpoh, Lber 16: Ka Meghalaya ASHA Workers Union (MAWU) mynta ka sngi kala leit ban ïakynduh syndon ïa u Deputy Commissioner ka Ri-Bhoi District ban ïa kren markhmat hadien ba bun ngut ki ASHA naka thaiñ Ri-Bhoi kila shah beh kam kynsan khlem kano kano ka jingpyntip ne ka jingmaham ba ki shah pynduh ïa katei ka kam kaba ki trei.
Kane ka jingleit kynduh ia u Deputy Commissioner ka Ri Bhoi, ka dei ruh hadien ba katei ka seng ki kynhun nongtrei ASHA ha ka jylla ki la ioh pdiang ia ka jingujor, ba la don bun ki nongtrei ASHA ki la shah pynduh kam khlem da don kino kino ki daw kiba biang bad la shu pynsangeh kynsan ia ki ban trei kum kita ki nongtrei ASHA ha Ri Bhoi.
Haba kren sha ki lad pathai khubor naka liang ka kong Sony Kharjana Asdviser jongka MAWU haka jingdonlang ka kong Mirajune Myrsing President lem bad ki dkhot kila ong ba kum ka kynhun ki nongtrei ASHA ki dap da ka jingkyndit bad sngewlyngngoh ban iohsngew ba bun ngut ki ASHA ha Ri-Bhoi ki la shah pynduh kam da ka jingbthah na u DC lyngba ka ophis jong ka DMHO.
Ka Kong Kharjana ka la bynrap ruh da kaba ong ba dei halor katei ka nongrim kum ki nongïalam kila leit ban kynduh markhmat ia u DC naka bynta ban ioh ka jingpynshai ha kaba ïadei bad katei ka jingshah weng kam kynsan jong kitei ki ASHA ba kum ka seng ka hap ban ioh ia ka jingtip kaba bniah halor kano ka nongrim ba ki la weng kam kynsan ia ki kum ki nongtrei ASHA.
