Nongston, Lber 16: Ki nongialam bad ki dkhot ka Seng Federation of Khasi Jaintia and Garo People (FKJGP) na West Khasi Hills District mynta ka sngi ki la mih paidbah ban pynlong ïa ka rally ha sor Nongstoiñ ban dawa na ka Sorkar Meghalaya bad Assam ban pynsted noh ïa ka jingïapynbeit ïa u pud u sam ha ki bynta khappud kiba dang sahteng.
Ha kane ka jingïaid rally la ïashim bynta da ki spah ngut ki dkhot ka FKJGP na kylleng ka distrik. La ïadonlang ruh ki nongïalam ka Seng Kmie kiba kynthup ïa u Bah Dundee C. Khongsit, President bad u Bah Eldie N. Lyngdoh, General Secretary. Nalor kata, ki dkhot ka KSU West Khasi Hills District lem bad ki nongsynshar shnong na ka thaiñ Langpih Nongmynsaw Syiemship ki la wan ban kyrshan ïa kane ka rally.
Ïa ka rally la sdang na ophis treikam ka FKJGP West Khasi Hills District kaba don ha Upper New Nongstoiñ, bad ki paidbah ki la ïaid kylleng ka sor Nongstoiñ ryngkat ka jingpyrta ban dawa naka sorkar ban pynbeit noh mardor ia u pud u sam
Hadien ka jingïaid rally, la pynkut ïa ka prokram ha Market Complex ka shnong New Nongstoiñ, ha kaba la pynlong ruh ïa ka jingïalang paidbah ban ïakren halor ka jingdonkam ban pynbeit noh ïa u pud u sam ha ki bynta khappud kiba dang jingïakajia bad ba dang sahteng ka jingpynbeit.
La ai jingkren ruh ha kane ka sngi da u President ba rangbah ka FKJGP u Bah Dundee C. Khongsit, ha kaba u la pynpaw ba ka jingsngewkhia ka seng halor ki jingsahteng ki kam pud ki kam sam, ka dei namar ba ka seng ka sngewkhia ia ki jingeh ki paidbah ha khappud kiba ju ia kynduh jingeh na ka por sha ka por tang na ka daw ka jingbym lah ban ia pynbeit ia u pud u sam.
“Ki jaid bynriew ki dei ki dkhot met jong ka seng, namar haba ki paradoh ki parasnam ki shitom bad mat jigneh, kum ka seng ruh ka pang ka mynsiem ban iohi ba ki jaid byrneiw ha khappud ki hap ban mad shibun ki jingshah thombor bad ki jingeh kiba dei tang na ka daw ki kam pud ki kam sam” ong u Bah Dundee C. Khongsit kum u nongialam ba rangbah ka seng FKJGP.
U la ong ruh bun ki dkhot jong ka jaid bynreiw ki duh ia la ka jingim, tang na ka daw ki jingiakajia ha ki khappud ka Meghalaya bad ka Assam bad kum ka seng ka sngewkhia ba ka jylla ka la iaid la 54 tylli ki snem, hynrei ka sorkar haduh mynta kam pat lah ban pynbeit lut ia ki pud ki sam hapdeng ka Meghalaya bad ka Assam.
Namar kata, u la ong ba ka seng FKJGP ka dawa jur na ka sorkar Meghalaya bad ruh na ka sorkar Assam ba ki dei ban pyndep noh ia ki kam pynbeit pud pynbeit sam ba kum ka seng kan nym lah ban shu peit ba ki dkhot ka jaid bynriew kin dang mat shibun ki jingjia ba sngewsih kiba dei tang ki daw jong ki kam pud ki kam sam hapdeng ka Meghalaya bad ka Assam kumba la sakhi ia ki jingjia kiba la jia ha ki por ba leit noh, u la bynrap.
