Nongpoh Lber 16: Ka Synjuk ki Seng Ki Kynthei Katholik Shillong Archdiocese Zone-VI ha ka sngi U Blei ka la pynkut noh ïa ka lympung iakynduh lang jong ki para longkmie kaba khatwei (11) bad ha kajuh ka por kum ka jingrakhe ia ka sngi kyrpang ki Longkmie ka baar sngi kynthih ïa kaba la pynlong ha Nongpoh Parish bad na ka liang ka Synjuk ki la buh ruh ia ka Thme, “Phi long ka mluh bad ka jingshai ka pyrthei ” ba la sot na ka Gospel u Matheus na ka lynnong kaba 5:13-14.
Ïa kane ka lympung ba ar sngi jong ki longkmie la wan ban plie bad kaweh lama da u Fr. Sedish Marak, uba dei u Spiritual Director katei ka synjuk kum u kongsan bad ha ka Sngi u Blei u Father Raphael Risterland Maiong u la long u kongsan ban pynmynta ïa ka Mass Bakhuid ha ka jingdon lang u Fr. Sedish Marak, uba dei u Spiritual Director katei ka synjuk, u Fr. Peter Syiemlieh Parish priest ka Nongpoh lem bad kiwei kiwei ki Lyngdoh Sohblei bad ki Brother ki Sister.
Ha ka nohphai sngi la sdang ia jingmane sakrament ba la pyndep ia ka jingleh riewlblei ia ka Sacrament da u Fr. Raphael Risterland Maiong bad uba la kren ruh Halor ka Phang halor lai tylli ki mat na ka bynta ki longkmie ba ki dei ban long ka mluh kaba bang ha ing hasem, ki hap ban long ka mluh ha ka Balang bad ka mluh ha ka imlang ka sahlang.
La pynkut ïa kane ka sngi da ka jingpynhiar ïa ka lama da u Sohblei Sedish Marak bad ka jingaiti ïa ka lama jong ka Zone sha ka Umkadhor Parish na ka bynta ban pynlong ïa kane ka lympung kaba 12 ha u snem 2027.
