Shillong, Lber 13: Ka MLA jong ka Shillong East constituency naka National People’s Party (NPP) ka Kong Ampareen Lyngdoh hynne ka sngi kala ong ba kam mih ka jingkylli, la ka kwah ne em ban iakhun iaka ilekshon MP shiteng samoi na Shillong Parliamentary Seat.
Haba kren shaki lad pathai khubor ka Kong Ampareen kala ong ba iaka rai ban ban pynieng kyrtong naka bynta ka ilekshon MP ka shong haka Party, iano kan pyniakhun.
Ka Kong Ampareen kala ong “Ka Party ka rai haba iadei bad u/ka kyrtong bad ka Party kan hap ban ioh jingmynjur na u/ka kyrtong hashuwa ban pynbna paidbah iaka kyrteng”.
“La ngan iakhun ne em haka ilekshon MP shiteng samoi, ia kata yn hap ban shim rai daka Party” kala ong.
Ka Kong Ampareen kala ong baka nalor ka ilekshon MP shiteng samoi, ka Party kan hap ruh ban pyrkhat haba iadei bad ka jingpynkhreh jong ka Party naka bynta ka ilekshon MLA 2028.
“Lada ka shong haka mon jong nga, nga kwah ban lait naka jingshah bate kam haba iadei bad ka ilekshon MP shiteng samoi namar nga kwah ban pynleit jingmut ban pynkhreh iaka ilekshon shaka Meghalaya Legislative Assembly” kala bynrap.
