Nongpoh, Lber 13: Kawei ka trok kaba kit ia ki tyndong lyer she jingshed (Domestic Gas Cylinder) ka la kem ding kynsan haduh ba ki thylliej ba shyrkhei kaba la klang bha ka la bam duh ia kane ka kali na bynta ba shakhmat, ha kaba kane ka jingjia ka la jia hynnin ka shiteng miet ha ka por 12:55 eiei hajan ka Khyrdop khrong khajna jong ka National Highway Authority of India (NHAI) ha Pahammawleiñ.
Katkum ka jingtip ba la iohlum, la ong ba katei ka trok kaba kit ia ki tyndong lyer ka dei kaba don ia u number AS 01 SC 1518 kaba dang kiew na Guwahati sha Shillong, hynrei hamar ba poi ha katei ka jaka kane ka kali ka la kem ding kynsan bad shah bam duh na ki bynta ba shakhmat bad ka daw la antad ba ka daw jong ka jinging kane ka kali ka la lah ban dei na ka jing short circuit ha katei ka kali.
La iathuh ruh, ba ki bor pulit ka Byrnihat Police Station lem bad ki bor pulit pynlip ding ka Fire and emergency service kumjuh ki nongtrei ka NHAI ki la poi marmar ha katei ka jaka ban pynlip ia ka ding kaba la klang bha bad ban pynlait pat na ki jingjia ba sngewsih namar ka jingbym iohlad shuh ka ding ban pur sha ki bynta ba la buh ia ki tyndong lyer.
Ha kane ka jingjia kam shem la don kano kano ka jingjia kaba sngewsih pyrshah ia ki nongleit nongwan ne wat ia u nongñiah jong katei ka trok namar ka jingkloi ban mih noh shabar jong ka kali bad ban wad jingiarap na ki riew paidbah bad ki nongtrei ka NHAI.
