Shillong, Lber 13: Ki nongialam jong ka State BJP ka Meghalaya mynta ka sngi ki la leit syndon ban ia kynduh ia u Lat ka jylla na ka bynta ban ia kren halor election MDC ha GHADC bad ruh ki jingiakynad kiba la ktah iaka shongsuk shongsain ki paidbah ha Rilum Garo.
Ha kane ka jingiakynduh ia u Lat ka jylla u CH Vijayashankar la ialam da u State President ka BJP u Rikman G Momin, u Bah A.L Hek MLA ka BJP na Pythorumkhrah, u Bah M. Kharkrang Spokesperson ka BJP lem bad kiwei ki nongialam, ha kaba ki la aiti ruh ia ka dorkhas ha u Lat ka jylla.
Ki nongialam ka BJP lyngba katei ka dorkhas ki la dawa ruh na u lad ka jylla ba un tuklar halor ka jinglong jingman ha Rilum Garo ba dei ban pyntreikam da ka Assam and Meghalaya Autonomous District (Constitution of District Councils) Rules, 1951, ba dei tang ki riewlum ba don ia ka Scheduled Tibe ki lah ban ia aireng ne thep vote ha ka election ka Garo Hills Autonomous District Council (GHADC).
Ha ka kyrwoh u nongai ktien ka BJP u Bah M. Kharkrang u la ong, “ kawei na kaba la ai jingmut sha u Lat ka jylla ka dei tang kito kiba don ia ka ST na ka jaid bynriew riewlum jong ka Meghalaya ki lah ban ia khun election bad thep vote”.
Kane ka jingiakynduh ki nongialam BJP ki la kyrpad jur ruh ia u Lat ka jylla ban wan rah da ka dorbar kypang ha GHADC ban pynthikna ba ka jingpynkylla ia ka ain (Amendment) ka dei ban ioh kloi ia ka jingmynjur kaba mardor na u Lat ka jylla.
Na ka liang u Bah Kharkrang u la pyntip ruh ba u Lat ka jylla u la kular ia ka party ba un shim khia mardor bad ruh ban buh da ka kynhun ki riew shemphang (panel of experts) ban tohkit bniah halor kane kam.
“lada ka kynhun ki riew shemphang ki la ai jingmut bad ai ka jingmynjur, u lat ka jylla un sa shim khia ban pyndep kloi katkum ki kyndon ki ain ba la pynkupbor da ka Riti synshar ka ri India” u la bynrap.
