Shillong, Lber 11: Na ka daw ka jingiakynad kaba la mih ha Garo Hill kaba la ktah ia ka shongsuk shongsain ki paidbah kaba dei halor ka election MDC ka GHADC, ka sorkar ka la pynbna ba ka la rai ban pynsangeh shwa ia kane ka election kaba la rai ban pynlong ha ka 10 tarik u Iaiong 2026.
Ia kane la pynbna da u Myntri rangbah ka jylla u Conrad K. Sangma, ba ka sorkar ka la dep ban shim rai ban pynsangeh ia katei ka election, kaba dei halor ka nongrim ka jingiakynad kaba la mih ha rilum Garo bad kaba la ktah ia ka shongsuk shongsain.
U la iathuh ruh nalor ba la rai ban pynsangeh ia katei ka election MDC ha GHADC kaba dei na ka jingiakynad kaba la ktah ia ka shongsuk shongsain bad na ka liang ka sorkar kan sa dang shong pyrkhat pat halor kane ka kam.
Kum ban pynkynmaw, kane ka jinghap pynsangeh ka sorkar ia kane ka election MDC ha GHADC ka dei namar ba la mih ka huri hura bad ka jingiakynad kaba jur ha rilum Garo, kaba dei halor ka jingpyrshah ki paid Garo ba ioh thep vote bad ban iakhun election MDC ki jaid byrniew Muslim kiba shong ba sah ha rilum Garo.
