Shillong, Lber 19: Ka Meghalaya Pradesh Congress Committee (MPCC) ka la pynbna ba kan bteng ïa ka jingïakhun ha iingbishar ka Meghalaya High Court pyrshah ïa ka jingïasoh jong saw ngut ki MLA barim ka Congress sha ka National People’s Party (NPP), ban pynpaw ba ym dei ban kheiñ sting ïa ka hok u paidbah.
U Secretary ka MPCC, u Manuel Badwar, u la ong ba ka seng kan ïai bteng ïa kane ka jingïakhun haduh ban da poi sha ka jingkut, wat hadien ba u Speaker ka Assembly, u Thomas A. Sangma, u la kyntait arsien ïa ki jingkyrpad ban pynduh ïa ka jinglong MLA jong kitei ki dkhot.
Kine ki MLA kiba la kyntiap naka seng Congress sha ka seng NPP ki kynthup ïa u Bah Charles Marngar MLA ka Mawhati, Gabriel Wahlang MLA ka Nongstoin, Celestine Lyngdoh MLA ka Umsning bad Ronnie V. Lyngdoh MLA ka Mylliem. Hynrei ka Congress ka la kam ba kane ka jingïasoh ka long pyrshah ïa ka aiñ bad dei ban pynduh ïa ka jinglong MLA jong ki.
Shuh shuh, ka Congress ka la kynnoh ba u Speaker u la shim rai bakla da kaba weng noh ïa ka jingujor khlem da bishar bniah, kaba long pyrshah ïa ki nongrim ka aiñ bad ki rai jong ka iingbishar ba hakhlieh duh ka ri India
Shuh shuh ka MPCC ka la pynpaw ba ka la long kaba pynkhreh ban leit ruh shaduh Supreme Court lada donkam, ban pynthikna ba ka jingïaphet seng kan ym dang jia shuh ha ki por ban wan.
