Shillong, Lber 17: Ka Akhil Bharatiya Vidyarthi Parishad (ABVP) Meghalaya unit ka la pynpaw ïa ka jingkyrshan ïa ki jingïakhih jong ki trai shnong Garo ha West Garo Hills bad kyntu ïa ka sorkar ban pyntreikam tyngeh ïa ki jingïada hapoh ka Sixth Schedule ha ka ilekshon jong ka Garo Hills Autonomous District Council, da kaba maham pyrshah ïa ka jingkynthup ïa ki bym dei trai muluk kum ki nongthep vote ne ki kyrtong.
Ha ka kyrwoh, u State Secretary ka ABVP, Bomsing Khongtir, u la ong ba ki jingïakynad kiba dang shen ha ka por thep kyrteng ha Tura kaba la pynmih ruh ka huri hura kala wanrah pynban ka jingbym shngaiñ haki trai muluk bad kynnoh ruh ba ki dei ki khar Bangladesh kiba don bynta ban pynkhih bad pynjulor ïaki jingdon jingem.
Ka ABVP ka la dawa ban don ka jingpeit bniah kaba shai halor ki Scheduled Tribe certificate, ban shim sienjam kiba pyrkhing pyrshah ïa ki nongwan shnong be-aiñ, ban pynkhlaiñ ïa ka jingïada ha ki khappud bad ban wanrah biang ïa ka shongsuk shongsaiñ.
Ka rukom treikam jong ka Autonomous District Council ka dei ban pynkupbor ïa ki trai shnong, bad ka seng ka la kyntu ïa ka sorkar bad ki bor pynïaid ba kin pynthikna ba ka ilekshon GHADC kan long kaba shongsuk, kaba hok bad kaba bud ïa ka riti synshar jong ka ri.
