Shillong, Lber 17: Ka seng Indian National Congress ha Meghalaya ka la pynpaw ïa ka jingpyrshah kaba jur halor ka rai jong ka sorkar jylla ban pynjlan da hynriew bnai ïa ka Garo Hills Autonomous District Council (GHADC), hadien ki jingïakhih paidbah namar ka jingpyrshah ïaka jingdon bynta ki bym dei ki riewlum (non-tribal) haka elekshon GHADC
Haba kren sha ki lad pathai khubor ka Deborah Marak Working President ka Meghalaya Pradesh Congress Committee (MPCC) ka la ong ba ka seng kam shym la ai jingmynjur ïa kane ka rai, bad ka la kdew ruh ba lah ban shim da kawei ka lynti kaba dei hok.
“Ka jingïai pynjlan haduh 6 bnai ka long kaba slem eh,” la ong ka Marak ha ki nongthoh khubor ha ka sngi Balang.
Ka la batai ba ki ilekshon ki lah ban long ha 27 na ki 29 tylli ki constituency, lait noh tang ïa Shyamnagar bad Balachanda, kiba long ka jaka pdeng jong ka jingïakajia ha kaba ïadei bad katei ka jingpyrshah jong ki Garo.
“Ka sorkar ka lah ban pynsangeh shipor tang ïa kine ki ar tylli ki constituency, hynrei ban shah ïa ki ilekshon ban ïaid shaphrang ha kiwei pat bad ka Executive Committee kaba thymmai ka lah ban wad ïa ka lad kaba bha ban pynbeit ïa kane ka jingeh,” ka la ong.
Ka Marak ka la ong ruh ba ka Congress ka kyrshan ïa ka jingdawa jong ki Achik ba ki bym dei ki riewlum kim dei ban ïakhun ilekshon ha Shyamnagar bad Balachanda. Ka la pynpaw ruh ïa ka jingbymhun namarba u Myntri Rangbah, Conrad Sangma, um shym la khot ïa ka jingïalang paidbah jong baroh ki seng sain pyrthei.
“U Myntri Rangbah u dei ban khot ïa ka jingïalang paidbah baroh ki seng sain pyrthei, hynrei um shym la leh kumta. Ngi lah ban ai jingmutngi la lah ban ai jingai jingïasyllok ban pynsangeh tang ïa ki ilekshon ha Shyamnagar bad Balachanda bad ban shah ïa kiwei pat ban ïaid. Hynrei u la shim ïa ka rai marwei,” ka la ong.
Ka Congress ka ngeit ba ka lynti kaba bha tam ka long ban pynsangeh tang ïa kine ki ar tylli ki constituency bad ban pynlong ïa ki ilekshon ha kiwei pat, khnang ban lait na ka jingïakynad bad ban pynbeit ïaki jingeh kiba jia ha Garo Hills.
Shuh shuh naka liang u Manuel Badwar MPCC Secretary u la ong ba ka GHADC ka dei ban thaw ïaki aiñ thymmai khnang ba tang ki riewlum kin ioh ban ïakhun ïaka elekshon, namar haka por ba thaw ïaki Autonomous District Councils hapoh ka khyrnit ba 6, u Jawaharlal Nehru u la kren shai ba ki ADCs ki long ki stieh ïada bad ki trai shnong ki lah long trai haka kam synshar khadar hala ki jong ki jaka jong ki.
