Shillong, Naitung 22: Ka Hynniewtrep Integrated Territorial Organization (HITO) hynne ka sngi kala phah tuklar ha u Myntri ka tnat Bording u AT Mondal halor ka jingbym pyntreikam ka MeECL iaka jingbthah ka Sorkar ban aikam iaki Home Guard Volunteers.
Haba kren shaki lad pathai khubor u President ka HITO u Bah Donbok Dkhar ula ong ba ka Sorkar lyngba ka tnat Home Guard haki snem bala dep kala pynmih iaka hukum ban thungkam iaki home guard volunteer haki shnat treikam jong ka MeECL katkum ka jingdonkam bad katkum ka jingai jingmut ka tnat Home Guard and Civil Defense ka Sorkar Jylla.
Ka HITO kala ong ba mynta la 40 snem, ki Home Guard ki trei kum ha ki jingdon jingem ka MeECL naduh ki Power Stations/Sub-Stations/Stores/Offices/Revenue/Collection Centres/ Checkpoint bad haki Gate.
Haba iadei bad kane ka HITO ka dawa na u Myntri ban bthah iaka tnat Bording ba kan bud ryntih iaka hukum bala pynmih daka Sorkar Jylla.
