Nongpoh, Naitung 22: U Deputy Commissioner ka Ri Bhoi mynta ka sngi u la khot ia kren ia ki nongialam ka Meghalaya Commercial Trucks Owners and Drivers Association na ka bynta ban ia kren halor ki 16 tylli ki khyrdop khrong Khajna kiba don ha Ri Bhoi, ba kitei ki kynhun ki la ju pynpaw jingeh na ka por sha ka por halor ka jingshah khrong pisa jubor ha kitei ki khyndop.
Ha kane ka jingleit kynduh ia u Deputy Commissioner ka Ri Bhoi, u Abhilash Baranwal la ialam da u President u Bah Mosklandar Marngar ha ka jingdon lang u Secretary u Bah Peter Marbaniang, u Spokeperson u Bah Wanshuwa Nongtdu lem bad kiwei kiwei ki dkhot.
Ha kane ka jingiakynduh, ka phang kaba ki la ia kren hakhmat eh ka long ban ia tai halor ka jingdon haduh 16 tylli ki khydop khrong khajna Ri Bhoi District ba la shah ktah ki Dribar Trok na ka jingshah khrong pisa beain ha kitei ki khyrdop, ha kaba kawei kawei ka khyrdop ki dribar trok ki hap ban siew haduh T. 200 haduh T.500 ha kitei ki khyrdop lum pisa beain.
Kumba la pynpaw da kitei ki nongialam, kane ka jingkhot u Deputy Commissioner ka Ri Boi ia ki kum ki nongialam ka Association ka long ban ia kren sani halor kitei ki khyrdop lum pisa beain kiba don ha Ri Bhoi bad ha kane ka jingiakynuh ki la ia rai ban ai ka jingiatrei lang na ka bynta ban pynduh noh ia kitei ki khyrdop khrong pisa jubor na ki Dribar Trok.
Haba kren sha ki lad pathai khubor u President ka Meghalaya Commercial Trucks Owners and Drivers Association, u Bah Mosklandar Marngar, u la ong ba ka Association kam kwah satia ba lyngba ka jingdon ki khyrdop lum pisa kan poi noh sha kata ka ‘Political Issue’, ha kaba kane ka jingiakhun kam dei satia tang mynta ba ki khyrdop lum pisa ka KHADC ki la don naduh u snem 2019 ba la lamkhmat da ka UDP ba la mih ruh ka thma haduh ba ki dkhot ki la poi ICU bad hadien kata la wan sa ka NPP ba ka jingiakhun pyrshah ia ki khyrdop lum pisa ruh ka dang bteng pyrshah ia ki nongap khyrdop bad shuh shuh ha kane ka EC ba mynta ba la lamkhmat da ka VPP ki dang don ki khyrdop ba kum ka kynhun ka kyrpad ban pynsangeh noh ia kine ki khyrdop ba lum pisa na ki paradoh ki parasnam ba ka la ktah shisha ia ka kamai kajih ha ki liang baroh.
U la ong ruh ba ka Association ka kwah ban ai jingmut ruh ia ka Council ba la lamkhmat da ka VPP ba ki kmen eh ban iohi iaka jingiatai ñia u President ba rangbah ka VPP u Bah Ardent Miller Basaiawmoit, ba ka KHADC ka dei kata ka waitlam bad ka shong hangi kumno ban ia pom da kaba nep ne da kaba luiñ bad lada ngi nang ban iapom da ka waitlam ba nep kane kan pynim ia ka jaid bynriew.
Namarkata, u la ong ruh ba ka Association ka kyntu kyntu ia u Bah Ardent, ba u dei ban hikai ia kane ka Council, namar u dei uba la shakri paidbah naduh ka kam seng bhalang shaduh ka kyrdan CEM bad kumba iohi mynta imat u Bah Bah Ardent u la shu aimon ia u CEM bad ki EM ba mynta ki bym pat tip bha ïaka ain. Ngi kwah ba u Bah Ardent un tuklar ban hikai ia kita ki bynta ban pyntreihok iaka ain ban khang ki kali ba nabar namar ban shu khrong pisa kam don jingmut bad kane ka pynjot pynban iaki briew jong ngi, u la bynrap.
Na ka liang u Spokeperson u Bah Wanshuwa Nongtdu ruh u la ban khia halor kine ki kyrdop kiba don haduh 16 tylli ha Ri Bhoi ba dei ban pynsangeh noh, khnang ban lait ban mih kino kino ki jingjia ba sngewsih ne ka jingiakhun thma kaba long hi para Khasi.
