Nongpoh, Lber 19: Daki spah ngut ki rang bad ki thei ïakura naki District bapher bapher jong ka jylla Meghalaya ki la ïapoi khrui ban ïa shim bynta haka Lympung ïakura kaba la tip kum ka 6th Meghalaya State Level Muay Thai Championship kaba la pynlong daka Muay Thai Association of Meghalaya ha Indoor Stadium Saiden, Ribhoi District.
Ïa katei ka lympung ïakura (Muay Thai) kaba 6 jong ka jylla Meghalaya la wan ban plie Pyrda da u Myntri ka Sorkar Jylla u bah Sosthenes Sohtun uba dei ruh u MLA ka Jirang Constituency haka jingiadonlang u Bah Angelus Sun President ka Muay Thai Association of Meghalaya lem bad kiwei kiwei ki dkhot jong ka Association.
Ha katei ka lympung la wan ban ïashimbynta haduh 255 ngut ki Nongïakura kynthup naduh ki Samla Kynthei bad Shynrang lem bad ki hep kiba dang rit bad katei ka lympung kan kut pat haka 21 tarik jong u bnai Lber.
Haba kren naka liang u President ka Association u Bah Angelus Sun u la ïathuh ba kane ka lympung ka long kum ka jingpynkhreh naka bynta ban sei iaki Nongiakura Muay Thai jong ka jylla ban ïa aireng haka Lympung National Game ka ban sa long u snem 2027 ha Nongbah Shillong.
Katba naka liang u Bah Sosthenes Sohtun kum u Kongsan u la ai khublei ïaka Kynhun Muay Thai naduh u Bah Angelus Sun kum u President uba la shimkhia ban pynlong ia kane ka lympung kaba long kum kawei ka rynsan kaba ailad ia ki khun samla ba kin nangkiew ha kane ka kam ïalehkai.
Ha katei ka sngi sdang, naka liang ka Association ka la pynkup Burom ruh iaki rang bad ki thei ïakura kiba la wan rah takma haki Jingiakhun kiba la long shabar ka jylla ha ki sngi kiba la leit.
