Nongpoh, Jymmang 03: Ki lai ngut kiba shong ha kawei ka Kali Wagon R kaba don ïa u Number ML 10 C 2766 ki la lait thaw na ka jingmynsaw kaba jur, kaba dei hadien ba katei ka Kali Wagon R ka la leit ban tynrah nadien ïa kawei ka Kali Swift ba ieng harud surok bad katei ka Kali Swift ruh ka la leit ban tynrah sa nadien shadien jong ka Trok.
Kane ka jingjia ka la jia mynta ka janmiet ha ka por 10 baje ei ei ha ka surokbah National Highway 6 ha Ri Bhoi ha ki bynta jong ka Shnong Umjarasi ha Ri Bhoi.
Katei ka Kali Swift ka don ïa u number AS 01 GM 8958 bad katei ka Trok kaba shah tynrah pat nadien ka don ïa u number ML 11 A 1474, ha kaba ha kane ka jingjia katei ka Kali Swift ka la julor bun bad katei ka Kali Wagon R ruh ka la julor na ki bynta ba shakhmat.
Ïa katei ka Kali Wagon R la niah da u Bah Gaurav L Mawlong na ka shnong Umiam bad ki ar ngut kiba don lang ki kynthup ïa u Kitbok Marbaniang 40 snem ka rta bad u Nobu Lama 30 snem ka rta kiba dei hi na Umiam. Kane ka jingjia ka la jia katba ki dang wan phai na ka thain Nongpoh bad khlem poi pyrkhat ha ka jingbakla kane ka Kali Wagon R ka la leit ban tynrah ïa ka Kali Swift bad ka Swift pat ka la tynrah sa ïa ka Trok ba ieng.
Halor kane ka jingjiia, kitei ki 3 ngut ki rangbah ki dang donbok ba ym shym la don ba mynsaw. Ki pulit ka Nongpoh ki la wan poi ruh mardor ha kane ka jaka ban pynlong ïa ka jingtohkit kiba dei katkum ki kyndon ka ain.
