Nongpoh, Jylliew 05: Ban pynsngewthuh ïa ki paidbah nongshong shnong ka Ri Bhoi bad ha ka jylla hi baroh kawei halor ka jingkordor ban ïada kyrpang ïa ka mariang na ka bynta ka pateng ban sa wan bad kaba long ruh shi bynta ka jingrakhe ïa ka Sngi kyrpang jong ka mariang, ka Alpha English Higher Secondary School, Nongpoh mynta ka sngi ki la pynlong da ka rally Bicycle kaba long ka thong ban ïalap sha ki paidbah ba ngi dang donkam ban ïada ïa ka mariang.
Ha kane ka rally Bicycle la shim bynta da ki khynnah skul ba la kot haduh 50 ngut tam, ha kaba la sdang na Alpha School shaduh sha ka ophis Sericulture bad wan phai biang sha ka phyllaw ka skul.
Ïa kane ka jingïaid rally ki bicycle la wan ban kaweh lama da u Officer in-charge ka Nongpoh Traffic u Rubul Ali bad la don ryngkat ka Kong W.K Blah, kaba dei ka Principal lem bad nonghikai bad ki khynnah skul.
Haba kren ha kane ka sngi, u Madhav Singh kum uwei na u nonghikai, u la pynpaw ba kane ka jingthmu ban pynlong da ka rally bicycle ka dei ka jingangnud ka skul ban pynphriang ïa ka khubor sha ki paidbah halor ka jingma kaba ngi pynjot ïa ka mariang bad la donkam ban ïada kyrpang ïa ka mariang na ka bynta ka pateng ban sa wan.
Shuh shuh, kumba la rakhe ïa ka sngi kyrpang ka mariang, kane ka rally bicycle ka pynkynmaw ruh ïa ki nongshong shnong ka Ri Bhoi bad ka jylla ba kum ki nongshong shnong ngi dei ban don kata ka jingkitkhlieh ha kaba sumar ïa ka mariang bad ym ban pynjulor pathar da kaba pom ne thang ïa ki khlaw kaba long ka jingma ïa ka mei mariang.
