Nongpoh, Naitung 16: Ha ka jingiakren bad ki riew rangbah na ki shnong bapher bapher kiba don ha ka thain Rani Bari, u Bah Sosthenes Sohtun, MLA bad uba dei ruh u MDC ka Jirang Constituency, u la pynpaw hakhmat ki riew rangbah jong katei ka thain, ba un trei shitom na bynta ban pynioh ia ki lynti synkieng ne ki surok ba bha sha baroh ki shnong kiba don ha ka thain khappud jong ka Meghalaya bad Assam.
Katei ka jingiakren hapdeng u MLA lem bad ki riew rangbah ka thain Rani Bari, ka dei ha ka sngi ba u la leit ban plie paidbah ia ka Sub Center, ia kaba la tei hapoh ka shnong Rani Bari, kaba dei ruh kawei na ki shnong kaba don markhap khappud hapdeng ka Meghalaya bad Assaam.
Ha ka jingiakren u MLA bad ki nongialam shnong ha ryngkat ki riew paidbah, ki nongialam shnong kiba la don ryngkat bad lem bad ki riew paidbah, ki la pynpaw ba ka long ka jingshisha ba u Bah Sosthenes Sohtun, u la lah shisha ban leh shibun ki kam bad khamtam eh ban pynpoi ia ki kam pynroi sha kitei ki shnong khappud.
Ha katei ka jingiakren, u MLA u la pynpaw hakhmat ki nongialam shnong, da kaba ong ba u sngewthuh eh halor ka jingeh ki paidbah kiba shong ba sah ha khappud, ha kaba ka jingeh kaba ki kynduh hakhmat eh ka dei halor ki lynti synkieng ne ki surok kiba biang.
Haba iadei bad ki lynti synkieng ne ki surok, na ka liang u MLA u la kular, ba un trei shitom na bynta ban pynioh ia baroh ki jingdonkam jong ki paidbah kiba sah ha khappud, khnang ba kan long ka jingmyntoi ia ki bad ruh ba kan long kum ki nongiada ne ki mawpud mawsam jong ka Meghalaya.
