Ka seng Hynniewtrep Achik National Movement, (HANM), Ri Bhoi District, ka la buh syndon da ka jingdawa na ka tnad Forest Assam, ba ka dei ban pynlait noh mardor ia u rangbah ba shah kem na ka shnong Belahari, ha ki bor peit ka tnad Forest na Assam.
Kane ka jingmih kane ka seng ban dawa pynlait mardor ia utei u rangbah, ka dei hadien ba uwei u rangbah, ba la tip kyrteng kum u Bah Bakstar Diengdoh na ka shnong Belahari, ha ki shnong khappud ka Meghalaya bad Asssam, u la shah kem ha ki bor pahara ka tnad Forest na Assam, kaba dei tang ka jingtam ia ki maw ban pynbha ia ka surok paidbah ha ka shnong Belahari.
Katkum ka kyrwoh ba la phah da u Vice President ka HANM, Ri Bhoi, Bah Sumar Lyngdoh, u la ong ba ka seng ka pyrshah jur halor kine ki kam thom bor ka tnad Forest na Assam bad ruh ki bor Pulit ka Assam ha kitei ki shnong khappud bad bunsiem na ka jingleh donbor ki tnad Forest bad ki bor pulit ka Assam ka wan rah pynban ia ka kynrum ka kynram bad kaba ktah ruh ia ka shongsuk shongsain ki paidbah ha khappud.
U la pynpaw ruh ha ka kyrwoh, da kaba ong ba ka seng kam lah ban pdiang ia kine ki kam thombor ka tnad Forest bad ha ki bor pulit ka Assam bad kane kam dei ka sien kaba nyngkong bad na ka por sha ka por ka la shu iai jia bad kiba mad pat ia ka jingjynjar ki dei ki nongshong shnong ka shnong ha khappud ka Meghalaya.
Namarkata, na ka liang ka seng HANM Ri Bhoi, ka la dawa mardor ia ka sorkar jylla, ba ka dei ban ia kren noh mardor sha ka sorkar Assam, namar ka bynta ban pynlait noh mardor ia utei u rangbah ba la shah kem bad kum ka seng kam kwah ba kum kine ki kam shah thombor, ba ki nongshong shnong na ka jylla Meghalaya ki hap ban shah na ka por sha ka por halor ki kam thombor ka tnad Forest na Assam bad ruh ki Pulit ka Assam., u la bynrap.
