Ka National Cadet Corps, North Eastern Region (NCC, NER) mynta ka sngi kan pynlong ïa ka jingïakop Inter-Group Band ha Guwahati ha ka 8 tarik Naitung ha kaba 174 ngut ki dkhot jong ka NCC na Guwahati, Silchar, Tezpur, bad Shillong kin pyni ïa ka sap jong ki ha ka jingtem jingrwai. U Additional Director General ka NCC NER, u Maj Gen Gagandeep un wan ban ia shim bynta ha kane ka jingïakop kum u kongsan, ban rakhe kyrpang ïa ka sap bad ka jingiatylli jong ki dkhot ka NCC.
Kane ka jingïakop kan kynthup ïa ka put ka tem, ka rwai ka siaw bapher bad ka thong ka long ban pyni ïa ka jingkut jingmut bad ka jingïatylli jong ki samla kiba dei ki dkhot jong ka NCC. Lyngba kane ka jingïakop, la khmih lynti ba kan ïarap ban tei bad pynkhlaiñ ïa ka jingïadei hapdeng ki dkhot jong ka NCC na kawei ka jylla sha kawei pat ka jong ka thain Shatei Lam Mihngi.
Ka jingdon ryngkat u Maj Gen Gagandeep ha kane ka jingïalang ka pyni ïa ka jingai kti bad jingkyrshan kaba khraw na ka liang jong ki bor ka NCC sha ki samla ka thain kiba dei ki dkhot jong ka NCC ba kin nang lah ban kiew shaphrang bad ban pyni ïa ka jinglah jong ki ha ka jingïakop kaba heh. La khmih lynti ba kane ka jingïalang kan long ka ban sah kynmaw ia baroh ki dkhot jong ka NCC kiba wan ban ïashim bynta.
