Nongpoh, Nailar 7: Tang kumba shiteng kynta eiei ka jingther jong u slap mynta ka sngi, kiba bun ki bynta jong ka khappud Meghalaya bad Assam ki la ngat biang ha ka jingshlei um. Ki jaka kiba la shah ktah eh kidei kum ha Baridua, ka surok bah National Highway 37 ha Jorabat bad ruh ha ki bynta jong ka 6th Mile Guwahati.
Kane ka jingshlei um, ka la pynlong ruh ia ka jingdheng kali kaba shyrkhei ha ki bynta jong ka surok bah Shillong-Guwahati ha Jorabat bad ruh ha ka shnong Baridua ha kaba la iohi sakhi ruh ia ka skul Savio Secondary School kaba la dap da ka um wat shaduh ki kamra klass.
Halor kane ka jingshlei um, u Myntri Rangbah ka jylla Assam, u Himanta Biswa Sarma, u la kyntu ia ki paidbah ba kin ialeh ban shong khop hala ki ing ki sem ki jongki, ban nym pyndonkam ia ki kali lait satang haba donkam eh bad ruh khamtam ban kiar ia ka jingpyndonkam kali ha ki bynta jong ka thain Downtown Hospital jong ka surokbah Guwahati-Shillong.
Shuh shuh, ha kaba iadei bad ka jingshlei um ha Jorabat, ki pulit pyniaid kali ka nongbah Guwahati, ki la pynmih ia ka jingpynbna paidbah ban kiar na ka leit ka wan ha kitei ki bynta jong ka surok namar ka jingdap um, kaba la wanrah ia ka jingdheng kali kaba shyrkhei bad kaba la ktah jur ia ka jingiaid beit iaid ryntih jong ki kali.
