Hadien ka jingpyrshah kaba jur ba la ia khih mynta ka sngi, ka MPSC mynta ka sngi ka la pan por 24 kynta na ka seng KSU na ka bynta ban pynlait ia ki Marks jong ki samla ba iakhun MCS bad ruh ka la kular ba weng noh ia ka Notification ba la pynmih ha ka 6 tarik u Nailar 2024.
Kane ka la long shi bynta ka jingjop jong ka jingiakhih ka KSU pyrshah ia ki jingthungkam thungjam hapoh ka MPSC bad ia kane ka la pyntip da u President ba rangbah ka KSU, u Samla Lambokstar Marngar, hadien ba la ia kynduh ia u Chairman ka MPSC.
U Bah Lambokstar Marngar u la iathuh ruh ba u Chairman ka MPSC u la kular ba hapoh ka 24 kynta ka MPSC kan pynlait paidbah noh ia ki marks ki samla pule kiba ia khun ia ka examination MCS. U la ong ruh ba ka MPSC ka kular ruh ban pynlait paidbah ia ki mark ki samla pule haba shit ba shai ia ki 3 tylli ki jingkylli ba la bakla.
U la bynrap ruh ha kaba ia dei bad kam MPS, ha ka Advertisement bala pynmih ha u snem 2019, ka ratio ka long 1:2.5 katba ha ka MPSC la pynkylla da kumwei kata shaka 1:1.5., ha kaba u Chairman yn nym lah ban shim rai marwei bad kin sa shim rai hadien shi sngi ar sngi hadien ban sa ia shong pyrkhat lang.
U Samla Lambokstarwell Marngar u la iathuh ruh ba u la kren shai ia u Chairman ka MPSC na ka seng KSU kam kwah ban pynih Advertisement da kumwei bad kin leh da kumwei.Kane ka jingwan wan tur ka seng ha ophis ka MPSC kam dei ban wan leh Drama lane ban pynhun iaka KSU hynrei ka dei naka bynta ban pynhun iaki khun samla kiba la thep bad kiba la iakhun ha ka eksamin, u la ong.
Shuh shuh, u la pynpaw ruh ba kawei na ka mat ba ka KSU ka la kren shai ha u Chairman ka MPSC ka dei ba ha ka Main exam bad ha ka personal interview, kim dei ban kylla ne kylliang ia uto u number jongki kumba kylliang jain. Na ka liang u Chairman ruh u la kubur ban leh kumba ka la ju long, namar kane ka jingkylla number ka lah ban dei kawei na ka kam bui tuh bad ia kylliang wat ia ka kam ka jam bad kumta ter ter kaba ktah ia ki samla wad kam, u la bynrap.
