U James K Sangma mynta ka sngi u la ther tyngeh ia ki kot khubor ka jylla ba kynthup ruh ia ka The Shillong Times halor ka jingkynnoh ba ka la don ka jingiapait ia pra hapoh ka ïing ka sem ka jong u bad ruh hapoh ka party National People’s Party (NPP) na ka bynta ka jingai ticket ban iakhun iaka ilekshon shiteng samoi na Gambegre konstitwensi.
Utei u myntri sorkar ba rim ka jylla, u la ong ruh ba ka long shisha ka jinglehrain ba kumno kat kita ki shlem ai khubor kiba la treikam mynta la 80 snem bad ialam da ki nongthoh khubor kiba la rangbah bha, ki lah ban pynmih ia ki jingthoh ha ka sla kaba nyngkong jong ka kotkhubor bad ki lad pathai social media ka jongki, khlem da pynshisha naei ki ioh ia kita ki tyllong khubor.
Kane ka jingther u James K Sangma ia ki kotkhubor ka jylla, kadei hadien ba ki la don katto katne ki kotkhubor kiba la pynmih khubor ba ka la don ka kynrum kynram hapdeng ka ïing ka sem jong u James K Sangma bad jong ka jong u Conrad K Sangma halor ka jingthmu ban ai ticket ia ka lok jong u Conrad K Sangma, ka Mehtab Chandee ban iakhun ia ilekshon shiteng samoi na Gambegre konstitwensi.
“Ngam don jingthmu ban iakhun ia ka ilekshon shiteng samoi na Gambegre. Ha ki jingialang jong ka party, nga la kren shai ia kane ka bynta”, la ong u James K Sangma ha ka sla X bad Facebook ka jong u bad bynrap ba kumba long haduh mynta, ym pat don satia mano mano na ki nongthoh khubor kiba la phone ia u ban ioh ia ka jingshisha halor kitei ki jingkynnoh kiba khlem nongrim, kiba pynjah burom bad ruh kiba ialam bakla ia ki paidbah.
U James K Sangma u buh ruh ka jingkyntu ia ki shlem kotkhubor ba kidei ban da wad bniah bha ia ki tyllong khubor, shwa ba kin kynthoh iano iano ym ban shu thoh katkum ba ki sngewbit ne mutdur namar kane ka pynpaw ba ki don ia ka jingthmu kaba sniew.
