Ka Dr Mazel Ampareen Lyngdoh, myntri jong ka sorkar jylla ba dei khmih ia ka tnad Information & Public Relations Department bad kiwei kiwei, mynta ka sngi ka wan ban plie paidbah noh ia ka shlem pynmih khubor ba thymmai jong ka jylla, kaba la jer kyrteng kum ka MeghalayaPost.News ha ka jingialang kaba la pynlong ha Circuit House, Nongpoh.
Ha kane ka sngi la wan ruh ban iadon ryngkat naduh u MLA ka Nongpoh, Bah Mayralborn Syiem, u MLA ka Mawhati, u Bah Charles Marngar, u MDC ka Nongpoh, Bah Balajied Rani, ki nongialam jong ki seng bapher bapher jong ka jylla bad kiwei kiwei de ki nongshah khot sngewbha.
Haba kren ha kane ka sngi, ka Dr Mazal Ampareen Lyngdoh nyngkong eh ka la ai khublei kyrpang ia u Bah Cornelius Laloo uba la sdang ia kane ka kam, bad pynpaw ruh ba na ka liang jong ka sorkar, kan ai ia ka jingiatreilang na ka bynta ban pynsaphriang ia ki khubor sha ki paidbah.
Katei ka myntri sorkar, ka la pynpaw ruh ia ka jingsngewbynniaw bad sngewkhia halor ka jingjur jong ki khubor thok khubor lamler ha kine ki sngi jong ka juk stad mynta kiba ialam bakla ia ki paidbah, da kaba ong ruh ba ka rukom pathai khubor katba nang mih ki sngi ki por kala nang pher, bad kyrmen ba lyngba kane ka khubor website kaba thymmai, kan lah ban ai ia ka khubor kaba paka sha ki paidbah bad ruh kan nang kiew ha baroh ki liang.
Ka la buh ka jingkyntu sha ki nongthoh khubor ba kidei ban long ki ba nym iashah liang bad ialam bakla haba ki thoh ia kino kino ki khubor hynrei ba kin long kum ki nongtei bad ki nongpyntip ia ki khubor kiba shisha, kiba tei bad ai jingmyntoi ia ka imlang ka sahlang jong ka thain bad ka jylla hi baroh kawei.
