Ka sorkar jylla ka la pynmih ia ka jingpynshai paidbah halor ka jingthmu ban plie noh ia ka jaka ri mrad lane kata ka State Zoo kaba don ha Umtrew, Ri Bhoi District, hadien ba ka la mih ka jingpyrshah na ki katto katne ki ‘riew paidbah ka ri lum Garo halor ka jingthmu ban pynkynriah ia ki jait shrieh kiba la tip kum ki Hoolock Gibbon na Sonja Wildlife Rescue Centre, Tura sha katei ka State Zoo kaba don Umtrew.
Halor katei ka bynta, ka sorkar ka la pyntip ba katei ka jaka ri mrad kaban sa plie shen ha Umtrew , kadei kaba la ioh iaka jingbit na ka Central Zoo Authority (CZA) bad baroh ki jingdonkam ha katei ka jaka, la dep ban pynbit pynbiang katkum ki kyndon kiba la buh, bad pyntip ruh ba dei halor kata ka nongrim, ba la lah ban pynkynriah ruh ia ki mrad kiba don ha ka Phan Nonglait Park na ka nongbah Shillong sha katei ka jaka ri mrad kaba thymmai.
Ha kaba iadei bad ka jingthmu ban pynkynriah ia kitei ki jait shrieh Hoolock Gibbon, ka sorkar ka la pynshai ba ka jingthmu kadei tang ia kito kiba don hapoh ka Sonja Wildlife Rescue Centre bad ym na ki khlaw ki btap jong ka ri lum Garo. La iathuh ruh ba ka Sonja Wildlife Rescue Centre kaba la treikam la slem bah, kadei tang ka jaka ban sumar bad pyllait im ia ki mrad bad kam dei satia ka khlaw lane kata ka jaka ri mrad kaba biang ba paka naba kam don ruh wat ia ka jingioh jingbit na ka Central Zoo Authority (CZA).
Ka sorkar ka la pynshai ki jingdonkam lane kita ki facilities ha Umtrew kidei kiba la mynjur da ka Central Zoo Authority (CZA) katba ka Sonja Wildlife Rescue Centre pat kamdei satia ka ba la ioh ia ka jingmynjur bad ban ong ba ka Sonja Wildlife Rescue Centre kadei ka jaka im laitluid jong kitei ki jaid shrieh Hoolock Gibbon kalong kaba bakla.
Dei halor katei ka nongrim ba ka Central Zoo Authority (CZA) kala buh hakhmat ka sorkar jylla ban pynkynriah noh ia kitei ki shrieh Hoolock Gibbon na Sonja Wildlife Rescue Centre sha kiwei kiwei de ki jaka ri mrad kiba la ithuh bad kiba don ia ki jaka bad ki tiar ki tar kiba biang bad katei ka jingthmu pynkynriah ia kitei ki mrad na ri lum Garo ruh kan long katkum ka Schedule-I jong ka Wildlife (Protection) Act 1972, katkum ka jingbthah jong ka Central Zoo Authority (CZA) ba ri ban sumar ia ki ha ka rukom kaba paka tam.
