U nongialam ka Bharatiya Janata Party (BJP) uba dei ruh u MLA jong ka South Shillong Konstitwensi u Bah Sanbor Shullai u la ong ba, lada donkam, ki shipai BSF ki dei ban siat ia ki nong Bangladesh kiba thmu ban rung beain sha Meghalaya.
Ia kane u Bah Sanbor ula ong ha ka jingleit jngoh jong u ha shilynter ki thain khappud ban jurip ia ka jinglong jingman ha ki shnong ka jylla Meghalaya kiba don ha khappud shilynter ka Bangladesh.
Haba iakren bad ki lad pathai khubor, u bah Shullai u la ong ba u sngewkhia hadien ba la mih ka kaiphod ba la kynnoh ba ki briew na Bangladesh ki pyrshang ban rung tuh sha Meghalaya hadien ka jingkulmar ha Bangladesh.
“Lada donkam, ki BSF ki dei ban siat haba ki thmu be-aiñ ban rung tuh sha Meghalaya. Kim dei ban rung sha ka liang jong ngi, ngi ruh ngin ym rung sha ka liang jong ki” ong u Sanbor.
U Sanbor uba dei u Chairman ka Meghalaya Tourism Development Corporation (MTDC) u la leit jngoh ia ki shnong kiba don ha khappud bad ka Bangladesh kiba kynthup ia ka Dawki-Tamabil bad Pyrdiwah.
“Ka jingleit jngoh jong nga sha ka thain khappud, khamtam sha ka shnong Pyrdiwah ka long halor ka nongrim ba ngam kwah ba ka jingjia kum kaba la jia ha u snem 2001 kan jia biang. Ki shipai Bangladesh ki la hiar thma bad knieh ia kane ka shnong” u la ong.
