U Myntri ka tnad pule puthi ka sorkar jylla u Rakkam A Sangma u la ong ba ka sorkar jylla shen kan pyntreikam ne plie ban pyniaid kam noh ia ka Shillong Engineering College, kaba dei kawei na ka shlem ai jinghikai ia ki samla ba kin pyntbit ia lade ha kaba ia dei bad ka jingpule engineer.
Haba kren mynta ka sngi bad ki Nongthoh Khubor hadien ka jingjurip ia katei ka Engineering College ha Mawlai, u Rakkam A. Sangma u la ong, “ ba ka jingtei ia kane ka college ka la dep bad kaei kaba sah mynta ka long sa tang ban pyntreikam noh ia kane ka College”. Bad bynrap ruh namar ba ka don hapdeng ka jingwad bniah da ka AICTE, ka sorkar kam pat lah ban plie ne pyntreikam ia kanr ka College. Ha kane ka jingwad ka AICTE, ka dei ban don la ka jong ka administrative building. Namar kata, ka sorkar ka hap ban buh la ka jong ka administrative building. Ka sorkar ka kyrmen skhem ba kane ka college ban ailad ia ki sala pule ban pule shaphang ka kam engineer kan treikam ne plie noh shen hapoh ka jylla,” u la bynrap.
U la ong ruh ba ka sorkar ka khmih lynti ba kan lah ban sdang noh ia ki katto katne tylli ki Course ha Shillong Engineering College ha ka academic session ban wan. Ka College kan don 5 tylli ki department ba kynthup ia ka sobjek civil engineering, mining, mechanical, electrical bad ka Computer Science.
Shuh shuh, u la ong ruh ba kane kan dei ka engineering college ba nyngkong eh ha ka jylla bad ka sorkar ka la shim khia bha na ka bynta ban thung ia ki nongtrei khnang ban lah ban sdang noh ia kane ka College. Namar kata, baroh ki kyndon treikam kiba dei katkum ka ki kyndon ka AICTE yn pyntreikam noh kham kloi khnang ban ioh ban plie noh ia kane ka engineering college hapoh ka jylla, u la bynrap.
