Nongpoh, Risaw 21: Kum kawei ka thong ban lum ban lang ia ki khun samla bad ruh ban kyntiew ia ki sap ki phong ki khun samla ha ki kam ialehkai phutbol, ka Raid Nongkyrla mynta ka sngi ka la plie pyrda noh ia kawei ka lympung ialehkai phutbol ba la tip kum ka 10ASIDE Football Tournamnet ba la pynlong ha madan ialehkai ka Shnong Dehal Bangan ba hap ha ka ka Raid Nongkyrla ha ki thain Byrnihat.
Ia kane ka lympung ialehkai phutbol la wan ban plie paidbah da u Lyngdoh ka Raid Nongkyrla u Bah Phrangsngi Syngkli kum u kongsan bad la sakhi lang ruh da ka jingdon lang u Bah Kendrowel Lapang, Chairman ka Synjuk ki Rangbah Shnong Byrnihat Area, ki rangbah shnong, ki nongialam ka Raid bad kiwei kiwei ki riew rangbah.
Ha kane ka lympung ialehkai ba la pynlong da ka Raid la wan ban shim bynta haduh 38 tylli ki kynhun ialehkai na ki shnong bapher bapher bad ha kane ka sngi plie pyrda ki ar tylli ki kynhun kata ka Umling SC bad ka Dehal (A) FC ki la long ki kynhun kiba ia knieh ia ka nam jop ha ka jingplie pyrda ia kane ka tournament.
