Ki nongïalam ka HNYF East Khasi Hills mynta ka sngi kila pynpaw ka jingsngew lyngngoh kaba khraw halor ka jingkem ki pulit ïa u dkhot ka seng bala kynnoh ba u donkti bad ka seng HNLC bad ki nongïalam ka seng mynta ka janmiet kila leit ruh sha thanad Nongpoh ban kylli bad ban wad jingtip ïaka daw ba ki pulit kila kem ïa u Bah Sanbor Rapsang ba bat kum u President ka HNYF Mawlai Circle bad Asst. Displinary Secretary haka sengkmie.
Haba kren sha ki lad pathai khubor naka liang u Bah Steve Khyriem President ka HNYF East Khasi Hills bad u Bah T Swer Asst. General Secretary ka seng kila ong ba kum ka seng ka dap da ka jingsngewsih bad sngew diaw bad kane ka jingpyntyrha jong ki pulit kam dei shuh ka sien kaba nyngkong. Tang ha kine ki khyndiat bnai ba lah dep, ki pulit kila kem ia u dkhot ba rim jong ka seng, u ba dei ruh u founder member, Bah Tarson Lymba bad kiwei kiwei de ki dkhot ka seng.
Ki la ong ruh ba ngim sngewthuh shuh ïa kane ka jingleh ki pulit kiba peit khmat beit tang ïaki dkhot ka seng HNYF ba haduh mynta ngi dang ïaid haka lynti kaba dei bad ngi dang burom ïaka aiñ bad byrngem ruh ba lada kane ka jingleh ki pulit ka dang bteng, ioh ka mih pynban ka jingjia kaba kham palat namar kumba long mynta u President ba rangbah ka HNYF u Bah Sadon Blah u long ruh kum u ksiang ka seng HNYF shaka miej jingïakren ïasuk bad ka sorkar hynrei kam don pat kano kano ka jingïadei kaba kyrpang bad ka HNLC.
Hynrei haduh ba thud ka jingkren ïasuk bad ka sorkar, ki dkhot ka seng HNYF kila shah kem thurmur kumba ki dei ki dkhot ka HNLC bad katkum ka jingïathuh ki pulit kila ong ba kila kem ïa u Bah Sanbor Rapsang ka dei namar ba u Switch Off ïaka phone naduh ba shah kem ki 4 ngut ki dkhot ka HNLC ha u bnai bala dep, la ong kitei ki nongïalam.
Kitei ki nongïalam kila ong ruh ba lada tang naka daw ka jing switch off ïaka phone haduh ba la shu tharai sniew bad wan kem haka por ba u dang leit shaw skul khun, bad kane ka jingleh ki pulit ka long ka bym lah ban pdiang namar kum ki dkhot ka seng ki don ka jingïadei bad ka seng HNLC namar ka jingkren ïasuk hynrei kam mut pat ba kin long dkhot lang.
“U Bah Sanbor u dei u ba la don khun don kti mano ban peit ïaki khun jong u mynta, lada ki pulit ki ong ba leh katkum ka aiñ kam pher ïaid katkum ka aiñ ngi ruh ngi don ka lynti ban leh ïa kaba donkam bad ngin peit lashai kaei ba ka iing bishar kan ai bor” la ong kitei ki nongïalam ryngkat ka kyrwoh kaba shai sha ka sorkar, khamtam u Bah Prestone Tynsong ba ka sorkar bad ka tnad pulit kam dei ban pynthud bad pyntyrha than ïaki dkhot ka HNYF ioh poi ka por ba kim lah shuh ban teh lakam.
