Kumba ia ka lympung ialehkai phutbol ba la tip kum ka 133rd Durand Cup yn pyniehkai ruh ha ka Nongbah Shillong, ha ka jylla Meghalaya, bad kum ka jingpyninam ia kane ka Durand Cup Trophy mynta ka sngi la rah ia ka Durand Cup Trophy sha ka sor Tura na ka bynta ban pynlong ia ka jingpyni paidbah sha ki paidbah ka rilum Garo.
Kum ban pynkynmaw, kane ka 133rd Durand Cup kan sdang ha ka 2 tarik u Nailar 2024, ban pynialehkai ha Jawaharlal Nehru Stadium bad ki kynhun kiba ia aireng ha kane ka Durand Trophy ki dei tang kito ki kynhun ba hap ha ka thup F, kiba kynthup ia ka FC Goa, Hyderabad FC, Shillong Lajong FC, bad ka Tribhuvan Army FC.
Ha ka jingialam u Dolrich B G. Momin, uba dei u Additional Deputy Commissioner, ka West Garo Hills, la pynlong ruh ia ka jingpyni paidbah ia kane ka Durand Cup da kaba iaid paidbah hapoh ka sor Tura bad ba la shim bynta ruh da ki kynhun nongniah thuk thuk, ki pulit bad ki riew paidbah ha ryngkat ki ophisar sorkar.
Ki ja ba la pyni nam ia kane ka Durand Cup Trophy ki kynthup ha ka jaka paidbah bah pa ha ka thainn Nazing Bazar, Araimile, Tetengkol, bad Hawakhana bad la pynkut pat sha PA Sangma Stadium.
Ha man ki jaka, ki bor pyniaid ki la kaweh lama shua ban pyni paidbah ia ka Durand Cup Trophy bad ia ki kongsan ha kane ka sngi la pnkup bururom ruh ha Super Market Tura. U Thomas A. Sangma, uba dei u Shongknor ka sorkar Meghalaya u la shim bynta kum u kongsan bad u la ruh ka jingkren ban ai mynsiem bad pynshlur ba ngi dei ban don kata ka mynsiem ieit sport bad ka jingiatrei lang ha kaba kyntiew ha ki kam sport bad kiwei kiwei ki kam kiba ai jingmyntoi ia ki khun samala.
La pynkut ruh ia kane ka jingpyninam ia ka Durand Cup Trophy, da kaba sam ia ki Ticket na ka bynta kito kiba angnud ban wan sakhi ha ka jingialehkai ki kynhun ha ka sngi sdang jong kane ka Durand Cup trophy bad la pynlong ruh ia ka jingiasoit paidbah ban ai ka jingkyrshan ia ka kynhun ialehkai ka FC lajong, kaba dei kawei na ka kynhun na ka jylla ban ia aireng ha kane ka Durand Cup Trophy.
