U MLA jong ka Sohra konstitwesni, u Bah Gavin Miguel Mylliem u pynpaw ia ka jingsngewkhia jur halor ka jinghiar jong ki nongjngoh kai pyrthei kiba leit ba wan sha ki thain Sohra naduh ka jingbat jong ka seng Hynniewtrep National Youth Front ia ki kali kamai bad kali shimet na Assam kiba thmu ban leit sha Dawki bad Sohra ha Umtyngar ha kine ki khyndiat taiew ba lah dep.
Haba kren sha ki lad pathai khubor, utei u nongmihkhmat ka Sohra u la iathuh ba katkum ka kaiphod kaba u la ioh na ki paidbah ka thain kiba ju im lyngba katei ka kam jngohkai pyrthei, la ong ba ka jingwan poi jong ki nongjngohkai pyrthei ka la hiar shisha naduh ka jingjia jong ka jingbat ka seng HNYF ia ki kali, kaba la ktah jur ia ka kamai kajih jong ki paidbah ka thain khamtam kito kiba buh ia ki dukan bad ki jaka sah kiba ju im jakpoh lyngba katei ka kam.
